HAARLEM—Burgemeester Wienen di Haarlem a pidi diskulpa pa envolvimentu di e Konseho munisipal den pasado di sklabitut.

E alkalde a hasi un presentashon di un investigashon riba e ròl di Haarlem den trafikashon di katibu. Haarlem no tabatin astiyero ni ofisinanan di kompanianan komersial grandi pero e siudat tabata benefisia si, segun investigashon ku e konseho munisipal a traha via instituto di Idioma i Etnologia di reino. Residentenan di Haarlem tambe tabata nabega riba barkunan ku tabata transporta katibunan.

Tambe e residentenan tabatin akshonnan den plantashonnan i posishonnan klave den kolonianan, segun e investigashon ta konklui. Wienen a bisa ku e hunta munisipal tin berguensa di mira otro banda pa e dolor di sklabitut den pasado i nos falta di konsiensia di e peso ku desendientenan ta karga. Segun WIenen tin mas ku 2000 desendiente di katibunan ta biba den Haarlem. Aña pasa zomer provinsia di Noord-Holland a pidi diskulpa. Komisario di Rei, Van Dijk a hasi esaki den kas provinsial na Haarlem durante apoertura di un eksposishon riba sklabitut. Otro siudatnan, provinsianan i instanshannan manera banko sentral hulandes tambe a pidi diskulpa. Rei Willem-Alexander a ofrese diskulpa den un diskurso 1 yuli último pa pasado sklabitut hulandes. Den su diskurso historiko el a pidi pordon pasobra su antepasadonan no a interveni.