A detenémi pòrnada bai warda ku mi pa despues di 8 ora lagami den libertat.

Willemstad, — Siudadano di 27 aña ku djaluna último a keda detené a su kas den Kaya Strena kier a splika ku e no ta sospechoso pa niun kaso di asesinato ya ku e víktima ta su amigu íntimo i e no tin niun sorto di problema kuné.

Tabata djaweps 29 di sèptèmber 2022 alrededor di 06.12’or Sentral di Polis a risibí notifikashon ku den kurá di un kas na Kaya Strena tin un hòmber drumí den un plas di sanger i no ta reakshoná. Mesora a dirigí unidat polisial na e sitio i nan a topa ku un hòmber drumí abou ku diferente perforashon di bala na parti ariba di su kurpa. Tambe polis a haña i konfiská un kantidat di ‘huls’ na e sitio i tabatin perforashon di bala den muraya di e kas. Dòkter di polis alrededor di 07.20’or a konstatá morto di e hòmber, Sidney Marten Mercelina nasé na Kòrsou dia 11 novèmber 1994. Riba òrdu di fiskal di Ministerio Públiko a tuma e kurpa sin bida den beslag pa mas investigashon. Investigashon den e kaso di asesinato a kontinuá i tabata  djaluna  dia 03 di òktober  2022 den oranan di mainta, polis a hasi un detenshon.

Tabata  alrededor di 05.48’or, Tim ku ta investigá kaso nan di homisidio huntu ku Tim di Aresto a hasi un entrada hudisial na un kas den Kaya Strena i a hasi detenshon di e hòmber sospechoso S.J.R. nase na Kòrsou di 27 aña di edat. Durante di e entrada hudisial a konfiská algun artíkulonan importante pa e investigashon. A presentá e sospechoso dilanti di un fiskal ouksiliar, ku a ordená su enkarselamentu pendiente di mas investigashon. E hòmber ku a keda detené  komo sospechoso den e kaso di asesinato e mesun dia esta djaluna a bin rekobrá su libertat.

E siudadano a splika ku enbèrdat a bin detené na su kas ora e tabata drumi i a bai warda kuné pa despues di un interogashon alrededor di 2 or di atardi a lag’é bai kas ya ku a bin tuma nota ku e no sa nada di e kaso di asesinato. E siudadano a splika ku loke a pasa sigur a trese yen spekulashon ku no ta kuadra. E víktima ku a fayesé tabata su mihó amigu i tur dia ta e mes tabata hib’é pa despues busk’é for di trabou. E dia di e suseso lamentabel tabata e mes ku a bai buska e víktima na trabou i a bah’é na kas alrededor di 11 or di anochi ya ku e víktima tabata laborá na un di e filialnan di horeca. Despues di e baha e víktima na kas e mes a bai su kas bai drumi pa mainta tuma nota ku e víktima a ser likidá. E siudadano a splika ku e hamas lo tin den su kabes di kometé algu asina ya ku e tin su famia i ku e víktima tabata su mihó amigu i tur hende sa esei.  
E víktima despues di a ser baha na kas for di trabou mester a sali bai un fiesta i tabata na su yegada  bèk na kas e la wòrdu likidá. Na final e siudadano  a splika ku e no por a komprondé dikon a bin  busk’é na kas den un forma asina ya ku por a yega serka dje tambe bisé ban pa hasié algun pregunta kual e ta habri pa kontesta ya ku e tambe kier pa e kaso wòrdu solushoná pa su amigu por sosegá na pas. Ku esaki kier indiká ku e siudadano ku a ser arestá i laga liber despues di 8 ora no ta un sospechoso den e kaso di asesinato Kaya Strena.