Back to Top
Vigilante banner image

Harms: Proyektonan di energia renovabel a lanta sentimentunan miksto


May 24, 2023 • 2 minüt pa lesa

WILLEMSTAD,- Tin sentimentu miksto ta biba bou di eks trahadónan di refineria isla despues di a tuma nota kon aktual gobièrnu ta selebrá ku a firma pa kontinuashon di proyektonan di energia renovabel. E trahadónan no ta kontra di e transishon energétiko ku por sierto ta den e programa di desaroyo di refineria Isla for di 2012, Hensley Harms, ku ta representá trahadónan di kontratista ta bisa.

Loke na su opinion si ta lanta e sentimentunan miksto ta e echo ku e mesun polítiko ku awe ta pro e plannan aki apénas 2 aña pasá a bòikotiá e proyektonan aki i a base di entre otro e bòikòt aki a yega na poder. Harms ta bisa ku e transishon energétiko tabata den plan di refineria pasobra ku tempu mester kuminsá kumpli ku normanan di medio ambiente.

E ta suponé ku awor ku e aktual gobièrnu tambe a realisá esaki nan a dobla nan rabu i bai di akuerdo ku e plannan di energia renovabel pasobra e eksigensianan di medio ambiente ta kore paralelo ku e trayekto di buska un operadó nobo. Banda di esei Harms ta bisa ku e transishon energétiko ta krea kuponan di trabou nobo i alabes ta krea ekspertismo nobo dunando trabou na 200 pa 300 persona.

Awor ku e gobièrnu aki tambe,despues di 2 aña a disidí di brasa e plannan di energia renovabel por mira un lus na final di e tùnel. Harms ta lamentá sinembargo ku último 2 aña tabata un desaster pa trahadónan di e refineria i si desaroyo di proyektonan di energia renovabel a tuma lugá den un etapa mas trempan, por a skapa algun shen kupo di trabou.

Resientemente Refineria di Kòrsou a invitá Harms i otro representantenan di trahadó manera sindikatonan pa duna nan informashon riba último desaroyonan. Ounke ku no tin fecha eksakto ainda a informá ku ta spera ku den e di dos mitar di e aña aki ta habri e 3 pa 4 unidat di e refineria pa start ku produkshon di asfalt. Re aktivá di e plantanan pa traha asfalt lo krea entre 300 pa 400 kupo di trabou.

Mientrastantu RDK ta sigui buska interesado pa drei e refineria den su totalidat. Na opinion di Harms mester invertí 500 pa 600 mion dòler pa drecha sierto unidatnan vital pa por produsí un produkto ku ta kumpli ku eksigensianan riba merkado internashonal. “Pregunta ta si ta logra saka e invershon aki bèk ku ganashi. Mas tantu dura pa habri e refineria atrobe mas grandi e interogatorio aki ta bira.”

Login