Zita Leito: RST a yega asina leu i kousa ku Zita Leito mester a bai Hues Komisario pa deklará dikon e mester a reuní ku Low Martines riba 21 di Ougùstùs.

Punda—Un enkuentro pa forma gobièrnu di Kòrsou riba 21 Ougùstùs 2024, a bira tópiko di opservashon pa unidatnan di RST ku tabata sigui Low Martines.

Durante e proseso aki, Low Martines i e hóben polítiko Lon Mutueel tambe a bira opheto di investigashon pa RST. Ámbos persona no tabatin nada di haber ku e opservashon di Martines, pero sorpresivamente a bini dilanti durante un interogashon na Hues Komisario ku riba 21 di Ougùstùs, Low Martines tabatin kontakto ku un dama i kabayero sospechoso.

RST, eróneamente a konfundí e situashon i relashoná tantu Leito komo Mutueel ku un kargamentu di droga i supuestamente riba 21 di Ougùstùs e suhetonan mester tabatin kontakto ku Low Martines. E opservadónan di RST, tabata funshonarionan hulandes oropeo ku no a bai kompañá pa un reshèrshi lokal, kende mesora lo a bisa nan na e sitio mes, ku nan opservashonnan tabata robes.

21 di Ougùstùs tabata un dia importante den investigashon kontra di Martines. Riba 21 Ougùstùs na momento Low Martines a bishita Gobernadó den kuadro di nan eskoho pa drenta Gobièrnu di Kòrsou, ya RST tabatin e lider di KEM bou di opservashon. Segun e komunikado di Ministerio Públiko, ta trata di un investigashon di por lo ménos 1 aña. Esaki ta konfirmá e notisia ku Low tabata bou di tap i investigashon kaba na RST. Pa Kabinete Pisas e opservashonnan tabatin konsekuensha.

Manera menshoná den Vigilante, Ministerio Públiko na Kòrsou, via Hulanda a risibi hopi informashon despues a logra krak e sistema di komunikashon Sky/PGP. Un seri di investigashon a inisiá na Kòrsou.  E investigashonnan tur a subi riba mesa na momentu ku outoridat internashonal a nota ku diferente yu di Kòrsou lo tabata utilisá telefòn nan Sky/PGP pa akshon nan kuestionabel. E kompania establesé na Canada “Sky Global” tabata bende telefòn nan ku tabata komuniká riba nètwèrk ku tabata difísil pa krak. Esaki a kondusí na aresto di Low Martines. Pero den e opservashonnan, RST a penetrá tambe den privasidat polítiko di Kòrsou. Zita Leito i Lon Mutueel, tambe a bira opheto di opservashon, despues di tabatin kontakto ku Martines.

Tabata riba un dia memorabel ku ta 21  di ougùstùs 2024, esta e dia ku Gobièrnu a kai i KEM a ser yama pa kuminsá papia pa forma Gobièrnu. Durante interogashon, Low a pidi un tiki tempu pa asina e por a splika kon tur kos a bai. Low a splika e ku e tabata sera na Barber sin kontakto ku niun hende. Dado momento e reshèrshinan a presentá pa interogashon i a bisé ku nan tin un mula ku a bin serka dje i a saka e potrèt mustr’é. Low mes no a hisa kara wak e potrèt   i solamente a bisa e reshèrshinan ku nan tin verbal falsu kontra i pa skibi den e relato di nan ku ta trata di un “ Bull Shit” kual a ser añadí na e verbal. E “mula” ku e reshèrshinan tabata referi na dje ta un reunion polítiko ku Low Martines tabatin ku e hóben prospekto polítiko Lon Mutueel, kende probablemente lo mester subi lista di KEM. Low a bisa  ku na niun momento nan no a bisé e fecha ku nan  a siguié i saka su potrèt huntu ku e testigu. Tabata despues ku su abogado a bin bishit’é esaki a bisé ku ta trata di un fecha importante ku ta 21 di ougùstùs 2024 kual ta nèt e dia ku Gobièrnu a kai i ku e mester sa huntu ku ken e tabata e dia ei. Tabata e ora ei ku e tende e fecha serka su abogado e por a kòrda presis kiko tur e la hasi e dia ei pero ya e reshèrshinan no a bin busk’é mas te ku  ora e la presentá dilanti Hues komisario e por a bisa presis huntu ku ken e tabata. 

Aparte di mutueel, RST a deskribí un “dama” den outo ku tabata kore tras di Low Martines. Low a bin topa ku e dama na Mambo i RST a deskribí esaki komo sospechoso. A bin resultá ku e dama ku RST a relatá den outo tras di Low tabata Zita Leito, kende a kore su tras pa sigui negoshá na Mambo ku Pik Pisas. E opservashon a hinka Lon Mutueel i Zita Leito den e problema ku nan dos no tabatin nada di haber kuné. Konsekuentemente, hues komisario a duna órden pa bai skucha ámbos pa konfirmá e deklarashonnan di Low Martines.