Back to Top
Responsive image
E korant di pueblo

Hóben no ta deseá ni su pio enemigu pa haña Covid


September 27, 2021 • 2 minüt pa lesa

Montaña: Ayera un hóben di 24 aña tabata konta su eksperensia durante e periodo ku e tabatin covid -19.  Segun e hóben e no ta deseá ni su pio enemigu pa haña e malesa aki.

E hóben a konta kon e promé dianan e tabata basta trankil pero kon poko poko e malesa a kuminsá bira mas ferfelu. E tabata pèrdè rosea masha hopi mes i tabata kai den pániko enorme. Bo ta kuminsá pèrdè rosea i kuminsá sinti hansha di morto. Bo no sa kiko pa hasi. Bo no por sinta, bo no por para. Kabes ta hasi doló, bo ta saka, nada no ta smak den bo boka, ni un tiki awa bo no por bebe. E hóben ta bisa, e mester a pèrdè 5 kilo den un tempu rèkòrt.

E hóben ta splika ku dado momento, e hansha a bira asina grandi ku e mester a buska yudansa. El a pensa e ta bai muri mes. El a bèl un amigu di spantá ku e tabata na kas. E amigu ku tabata okupá mesora a pone otro amigunan na altura di su situashon. Bou di konsehonan di e amigunan, e hóben a bèl pa ambulans pa bin buské pero ambulans a bisé ku ta dòktor di kas e mester bai promé. Despues di un ratu el a disidí di bòlbe bèl ambulans paso e situashon tabata birando pio.

Akinan el a splika riba hansha tur e sintomanan ku e ta sinti kual segun e hóben tabata kruel. Den su mes palabranan e tabata bisa: ‘’Mi tabata sinti manera mi ta hoga muri.’’ Ora el a kaba di splika e persona na telefòn kon e ta sintié, e persona a bisé, trankil, loke bo ta sinti ei ta solamente 35% di e malesa. Pues bo ta bon ainda. Keda trankil. Einan e hóben a rabia i manda un grandi na telefòn bisando ku ta ora mi muri, ambulans ke bin buské ? E persona na liña den un forma basta amigabel a splika e hóben pa e keda trankil i spliké kiko lo pasa ku si e bin keda den hospital. Pues e diferensha di kas i hospital.

Despues di e splikashon aki, e hóben a bin trankilisá i a disidí di sigui ku su lucha na kas mes. Danki Dios el a surpasá e malesa i djasabra último el a tèst negativo. Den e grupo sintá ta skucha su historia, tur hende a keda asombrá, paso nan konosé komo un hóben deportivo I balente. El a bisa nan, ku ni su enemigu e no ke pa haña covid. E mes no tabata ke bakuná pero, e ta bisa mihó el a bakuná. E ta rekomendá tur hende bai bakuná, prinsipalmente e hende di un edat mas avansá. Paso ku e mes ku ta jòng, covid a dalé spanté duru asina, ki ta para pa e hendenan grandinan. No hasi wega.

Login