Krakeel—Kòrsou a habri un siman bastante tristu, momento a drenta un notisia di un morto tráfiko i ta trata di un hóben di 16 aña. Ta trata di Jureldrick  Claysen Joel Ortela, konosí komo “Baton” bou di su konosínan i nasé riba 14 di Novèmber 2005. Ortela tabata na kaminda pa kas na Zumbu 121 unda e tabata biba, momentu e aksidente a tuma lugá.

Komunikado ofishal

Segun e komunikado ofishal di polis tabata djaluna 01 ougùstùs 2022 alrededor di 06.19’or, Sentral di Polis a risibí informashon di un aksidente bastante grave ku a tuma lugá riba Weg naar Westpunt na altura di Krakeel. Na yegada di e promé unidat, el a bin topa ku e vehíkulo ku a aksidentá kontra di un kantor di number. For di investigashon a sali na kla ku shofùr di e vehíkulo aki tabata kore riba Weg naar Westpunt direkshon di Barber. Pa motibunan te ainda deskonosí, shofùr di e vehíkulo aki a pèrde kòntròl riba su stürwil i kore den skual. A konsekuensia di esaki, e outo a bai dal kontra di un kantor di number. Den e vehíkulo tabata tin dos hòmber, un shofùr i un pasahero sintá patras. E víktima sintá patras, ya no tabata duna señal bida. Dòkter di polis a konstatá morto di e hòmber víktima Jureldrick Ortela di 16 aña nasé na Kòrsou na e sítio ariba menshoná debí na múltiple herida na kabes, miéntras e shofùr a wòrdu transportá ku urgensia dor ambulans pa sala di emergensia di C.M.C.

Sitio di aksidente

Polis a bin deskubrí e vehíkulo, un Kia Picanto pretu bastante destrosá ku su parti patras pegá den un kònteiner ku ta sirbi komo ofisina di number dje kadena di Joe Black. Mesora a konstatá ku e shofùr ainda tabata ku bida i ambulans a transport’é ku urgensha pa CMC.  Pero lástimamente, Baton Ortela di 16 aña a keda pegá patras den e vehíkulo i ya no tabata duna señalá di bida. E vehíkulo tabata bastante kibrá dilanti komo patras, miéntras dilanti e bateria dje vehíkulo a keda bentá abou i den banda dje shofùr a nota tambe ku e wanta lodo dilanti tambe a bin los fo’i dje vehíkulo. A bin haña tambe e kònteiner bastante doblá indikando un konfrontashon duru dje vehíkulo kontra di e heru di kònteiner, kual konfrontashon probablemente a kousa morto di e hóben Ortela.

E outo manera menshoná a bin para ku su baul kontra di kònteiner miéntras ámbos banda dje vehíkulo tabata indiká daño material. Esei ta nifiká e vehíkulo a risibi daño, fronta severo, na baul severo i na parti di pasahero i di shofùr. Esaki a kondusí mesora na un investigashon. Mester nota tambe ku e tapa solo di zim na e kònteiner tabata kologá kasi riba e vehíkulo na yega di e promé patruya di polis.

Investigashon preliminar

Reshèrshinan tékniko huntu ku funshonario di investigashon forensiko a start un investigashon na e sitio de inmediato. A saka ekipo di fotograf i imáhen visual pa duna sosten na kompilashon di e informashon riba e aksidente. A bin konstatá ku e Kia Picanto pretu tabatin problema den su kòntròl promé di e bin pega den e kònteiner. Investigadónan a bin deskubrí rastro di brek i maniobra kasi 45 pa 50 meter leu fo’i unda a bin deskubrí e vehíkulo pará. A inisiá ku ponementu di indikadónan unda e falta di kòntròl a kuminsá i tambe a sera e kaminda den sekshon pa no risibi molèster di e tráfiko pasando.

Konklushon

Segun e informashonnan preliminar, den oranan di mainta tempran e Kia Picanto tabata kore bai direkshon Banda Abou i nèt na frontera di Krakeel i Tera Kora. Den un bògt falsu, 50 meter for di e snek bieu i ofisina di number Joe Black,  e vehíkulo a bin pèrdè kòntròl i baha fo’i kaminda. Bahando fo’i e kaminda prinsipal riba asera di tera, e vehíkulo a pasa dal racha un staka di koriente di palu kousando daño leve na e staka. Despues di e konfrontashon ku e staka, shofùr di e vehíkulo lo e pèrdè kòntròl riba e vehíkulo i bai resultá ku su baul den e kònteiner di heru. Polis ta investigando tambe e motibu kon bini Ortela tabata sintá patras den e vehíkulo, pa kual motibu kisas e konfrontashon di e parti patras di e vehíkulo a bin kousa su morto.