Hóben nan den detenshon hubenil por siña hopi riba e frontal digital via e program ”Nos ta Konektá”.

WILLEMSTAD,– For di 2017 tabata tin plan riba mesa pa Fundashon Kòrsou Habrí duna e kurso di “Nos ta Konektá” na hóben i personal di JJIC. Apesar ku e proyekto a keda pegá atraves di aña, na 2021 bida nobo a drenta den e proyekto kaminda na yüni 2022 e proyekto a kuminsá ku su promé fase.

Ya kaba pa 9 aña Fundashon Kòrsou Habrí ta dunando e kurso “Kòrsou ta Konektá”, ku meta pa eduká hóben nan tokante e desaroyo digital. E meta prinsipal ta pa siña hóben di e edat di 6 aña pa 17 aña tokante digitalisashon, kaminda e énfasis ta pa hóben nan den bario “marginal” risibí e kursonan.

Despues di diferente kurso ku a finalisá eksitoso, “Nos ta Konektá” a trata na duna kurso den JJIC. Via di diferente donashon ku a suma 53 mil florin, Fundashon Kòrsou Habrí por a kuminsá ku dos fase di e trayekto di “Nos ta Konektá”.  E dos fasenan ta inkluí e promé fase kaminda 8 empleado ku ta guia e hóben nan, lo risibí lès di lèptòp i otro material digital. Ta trata aki di shete diferente lès ku a dura dos ora largu. I mas aleu, tur siman e hóben nan lo risibí lès di lèptòp i riba kondishon nan estrikto, e hóben nan por bai ku e lèptòpnan na e sala sentral pa sigui traha ku e lèptòpnan.

Kaminda e promé fase a kore di yüni 2022 te ku dezèmber 2022, e segundo fase a kore den e promé mitar di aña 2023. E segundo fase a kuminsá ku lès pa e hóben nan siguí pa kurso pa e empleadonan ku ta guia e hóben nan i e fase a terminá ku 11 lès pa e hóben nan atrobe. Lamentablemente 4 lès a kai afó debí na ousensia di internèt, pero apesar dje reto, Fundashon Kòrsou Habrí a indiká ku e proyekto Nos ta Konektá na JJIC tabata eksitoso.

E hóben nan a siña hopi i tur a logra e metanan ku a keda stipulá. Riba 7 di yüli 2023 un presentashon a tuma lugá kaminda kada hóben mester a duna un presentashon mester a duna un presentashon tokante un aplikashon. Apesar dje éksito e fundashon ta rekomendá pa e hóben nan risibí lès tokante sabiduria di media pa asina e hóben nan te ménos vulnerabel tokante e peligernan ku internèt ta trese.