Den fin di siman tras di lomba, e menor di edat a sufri dos paro kardiako, unda na e segundo okashon ya no por a hasi nada mas pe.

LA PAZ – E menor di edat di apénas 11 aña ku a keda abusá pa kuater hòmber i kende nan a peg’é ku AIDS lamentablemente a fayesé den oranan di djasabra tras di lomba na un sentro médiko di e siudat Boliviano Santa Cruz, unda el a keda interná un siman pasá den kuido intensivo.

E direktor di Servisio Departamental di Salú, di Santa Cruz, Edwin Viruez, a konfirmá na medionan di komunikashon di morto di e hobensito, kende un dia promé a drenta den koma.

E kondishon i e situashon di su salú tabata bastante krítiko i lamentablemente ya no por a hasi nada mas pe.

E komandante di Forsa Speshal di Lucha kontra Violensia, di Santa Cruz, Carlos Oporto, a señalá ku e menor despues di a drenta den koma, a sufri dos paro kardiako. Na e promé okashon el a logra keda reanimá, pero ya no por a hasi nada na e segundo okashon.

Oporto a indiká ku e kaso aki ta un kaso grave di violashon i awor morto di e menor di edat. Esaki ta pone ku tin mas situashon ku por agregá na e delitunan.

E presidente di Bolivia, Luis Arce, a afirmá ku e kaso aki no por keda impune i den mesun rosea a ekspresá su palabranan di kondolensia na famianan.

E kaso aki a bira konosí siman pasá, despues ku e mama di e menor di edat a pidi pa hasi hustisia pa su yu, despues ku el a keda violá na diferente okashon pa kuater hòmber ku tabata su bisiña i tabatin e menasá.

Aña pasá, e menor di edat a keda detektá ku e enfermedat i pa ku e situashon e mes a bin konta di e abusu nan di kua e tabata víktima na man di kuater hòmber, kende despues e mes a logra identifiká.

Dos di e agresornan aki a resultá di ta menor di edat, di 15 i 17 aña, i e otro dos nan di 23 i 28 aña. Esun di 28 inkluso a fayesé resientemente den e aña aki pa kousa di e malesa ku kua nan a pega e menor di edat kuné.

Den oranan di djárason siman pasá, den e lokalidat di Yapacaní, di unda e mucha tabata, bisiñanan a bai na e husgado unda un di e abuzadornan tabata, a sa di pasa polis, saka e hòmber i gòlpi’é.

E akusado a logra keda reskatá pa agentenan polisial i mandá pa un prizòn di Palmasola, na Santa Cruz, esun mas konfliktivo di e pais. Esaki ku un detenshon preventivo di 180 dia, miéntras ta hasi e investigashonnan nesesario.

E otro detenido, menor di edat, a keda remití pa un husgado di menor i lo ta detené den un sentro di rehabilitashon Cenvicruz.

Esaki miéntras ku e terser akusado, tambe menor di edat, ta profugo i ta kere ku e lo por ta na Chile, pa kua outoridatnan ta realisando e trámitenan nesesario pa aktivá alerta migratorio.