Yegada di Polis na adrès na Flip.

Nieuwe Haven— Korte a trata kaso kontra di e hòmber O. Ersilia unda ku ta akus’é di tabata doño di 1598 mata di mariwana i tambe pa inkubrimentu di dos kròser di marka KTM. For di na momentu ku a detené e hòmber a indiká ku e mata nan ta di dje i ku e tin nan pa remedi.

Tabata dia 23 di Febrüari di e aña aki ku Polisnan di Barber huntu ku un Fiskal Ousiliar a tene un entrada hudisial na un adrès na Flip unda a bin deskubrí un plantashon formal di mariwana. Tabata despues di a haña informashon ku na e adrès na Flip mester tin kosnan dudoso tumando lugá e tim di Polis di Barber a bai pa asina por a hasi mas investigashon. For di na e entrada riba e tereno a bin topa ku algun planchi di mariwana den un pochi kual ya a duna e indikashon ku enbèrdat tin kosnan fuera di normal tumando lugá. Parti patras di e kas a bin topa ku un  kantidat di mata nan di mariwana planta kual tabata wòrdu bon kuida.  Mas riba e tereno a bin topa ku un kantidat di matanan di mariwana planta mas grandi ku ya tabata floria. A sigui bai mas patras den e mondi unda a bin topa ku un plantashon mas grandi ku nèt tabata wòrdu muha. 

No a dura masha ku un hòmber a kana subi e tereno i a indiká na e polisnan ku te ta biba na e adrès i ku tur e mata nan ta di dje. E hòmber a splika ku e tin problema ku kurason i ta kobrando ònderstant i sigur e sèn no ta yega i p’esei e la opta pa bai planta mariwana pa yega na sèn. Tambe e la bisa ku e ta usa e mariwana pa remedi pa su malesa. E hòmber aki a resultá di ta e akusado O. Ersilia, durante tratamentu di su kaso e la indiká na wes ku e tin e mata na di mariwana pa su mes pa asina e por trata remedi pa por yud’é ku su salu.

Tambe e la splika ku e dos kròser nan ku a bin enkontra na su kas ta kròser ku e ku su yu tabata uza pa por bai den mondi pa bai wak kabritu, i ku e la kumpra esaki nan for di 2 pa 3 aña pasa. Fiskal mr. Janssen a indiká ku no tin sufisiente prueba pa loke ta trata e kròser nan i ku e no por bisa ku ta trata aki di 2 kròser ku ta hòrtá. Pero si e por bisa di e mata na di mariwana ku a bin enkontra den e akusado su kas, segun fiskal pe ta difísil kere ku tur e planta nan di mariwana ku a bin enkontra na e kas ta pa e akusado mes. Fiskal a hasi un demanda di 36 luna di kual 12 ta kondishonal i 3 aña di prueba.

Wes a indiká na e akusado ku e no ta kere ku e ta doño di tur e mata nan di mariwana ku a bin enkontra i ku e tin un sintimentu ku e akusado ta tapa pa un otro hende. Wes no a bai di akuerdo ku e demanda di fiskal i a kondena e akusado na 24 luna di prizòn di kual 12 ta kondishonal  i 3 aña di prueba.