Ayera Velder a tende un sentensia di 7 aña mas 6 luna despues ku Fiskal a hasi un demanda di 8 aña di prizon.

Willemstad— E akusado Juimar Velder ku tambe tabatin vários akusashon den su kontra i a tende un demanda di 8 aña a presentá den korte pa asina por a tende su sentensia.

Juimar Velder a wòrdu akusá di atrako ku arma unda e la kita un vehíkulo ku ta pertenesé na e otro akusado Richendel Labeet for di dos dama ku tabatin esaki di hür. Tambe e ta wòrdu akusá di  a forma parti di e importashon di kokaina dia 23 di aprel 2023 huntu ku Labeet mes i tambe Naigel Obispo.  Poseshon di arma i munishon 23 mei  te ku 7 di yüni 2023. Velder mes a atmití ku ela kometé e atrako i a kita e outo bou di menasa di arma di kandela dor ku Labeet tabata debe un montante di plaka.  Fiskal si tabata haña ku Velder tabata e sòldat di e grupo i a sali pa bai kobra Labeet pa e droga ku a ser hòrta for di riba e boto ban pa Bai.  Velder a bisa si ku e no a bai ku niun  pertinenshanan di e damanan ku tabata den e vehíkulo ya ku e la asta duna nan chèns pa kue nan tas i no ta manera nan ta bisa ku e la bai ku nan tas ku plaka den dje. Velder mes a atmití ku e tabata den poseshon di arma pa e defendé su mes ya ku e ta gusta kana ku prenda bisti.

Pa loke ta trata di e importashon di 190 kilo di kokaina i arma di kandela  den e boto Ban Pa bai dia 23 di aprel 2023 e la ninga indikando ku ta piska nan a bai buska i e no sa nada di droga. Loke ta trata di e problema entre e ku Labeet ta algu personal i e la kita e outo i a pluma esaki bende e piesanan. Labeet a hasi un demanda di daño perhuisio ya ku nunka mas e la haña su outo. Ayera Hues a dikta sentensia i a dikta ku ta proba e  importashon  di a 190 kilo via e boto Ban Pa bai. E atrako tambe por wòrdu proba ya ku e akusado mes a atmití esaki. Tambe e poseshon di arma di kandela for di dia di e atrako te ku dia a detené Velder ya ku na momento di e entrada hudisial na su kas a bin haña  arma di kandela i tambe munishon.  Na final Velder tin ku paga Labeet e montante di 8 mil florin pa e outo ku e la kita bai kuné u nunka mas a hañ’é. Tur esakinan a pone ku hues a yega na un kondena di 7 aña mas 6 luna kitando e dianan ku ya e tin sinta.