ROTTERDAM– Un hòmber a keda heridá ayera nochi despues di a aktivá un eksplosivo na un kas den bario di  Charlois den Rotterdam.

Segun polis riba imágen di kámara por mira ku e hòmber a hui ku su mannan na kandela. E eksploshon a tuma lugá den kareda di di 02.50 am di mardugá. Dor di e eksploshon, a surgi un kandela basta grandi ku a kousa basta daño na entre otro, un skuter ku tabata parker den serkania di e kasnan tambe a kima. Tambe diferente kas a risibí basta daño di e eksploshon i e kandela. Tambe tabatin tres kas ku tur e bentanan a kibra konsekuensia di e eksploshon. Dos outo tambe a risibí daño di e eksploshon segun Omroep Rijnmond. Bomberonan ku a yega rápido na e sitio, a logra paga e kandela basta lihé. Fuera di e sospechoso ku a mira riba kámara,no tabatin ningun herido. Ainda polis ta buskando e sospechoso. Tambe polis a bai e hospitalnan den serkania pa puntra òf wak si tabatin hende ku mannan heridá por a bini pa ayudo. Pa polis e insidente aki ta komprobá loke nan a atvertí basta bia kaba. Tambe pa esnan ku ta ehekutá e eksploshonnan aki tin un riesgo basta grandi pa keda heridá i hasta por pèrdè nan bida. E eksplosivo ku ta wòrdu improvisá  i ku ta wòrdu usa pa e eksploshonnan aki ta hopi peligroso. Mardugá di djadumingu pa kue djaluna tambe tabatin un eksploshon den mesun kaya, pero algun kas mas dilanti. Polis ta investigando   dos insidentenan i pa mas lihé por pone man riba e malechornan aki.