WILLEMSTAD,—-Vigilante Farándula a bin ta tuma nota ku, diferente artista músiko ta birando konsiente pa loke ta trata e parti di bakunashon. Di informashon risibí ta bisa ku, hopi ta e artistanan ku ya a yama i reserva nan fecha pa tuma nan Bakuna.

Esaki sigur ta un notisia positivo. Esaki ta nifiká ku si tur artista músiko ku ta move den sektor farandulero bai Bakuna mas tantu ku ta posibel, e chèns ta bira mas grandi ku e porta di farándula por habri bèk, pero den un forma responsabel kaminda ku músikonan por bai gana nan pan di kada dia, pa asina nan por mantené nan kas di famia.

Vigilante Farándula a tuma nota ku algun kantante i músiko popular a bai Bakuna i nan mes a pone esaki riba nan página di FaceBook, esaki ta pa hasi nan otro koleganan músiko konsiente ku COVID-19 ta mas serio ku hopi di nan ta pensa. Pero loke ku ta importante ta e echo ku músikonan di tur género musikal ta kla pa bai Bakuna, i si e sektor farandulero ta Bakuna, esaki ta nifiká ku e Gobièrnu nobo ku ta bai sinta na luna di mei, su trabou ta hopi mas fásil ku esunnan aktual. Paso nan ta bai haña un kas limpi i ku ya ta konsiente kon nan tin ku bai move den un farándula responsabel.

Vigilante Farándula a papia ku e legendario kantante kompositor areglista Ike Jesurun, ku ta un di e músikonan ku a Bakuna, t’asina ku Ike a bisa Vigilante Farándula ku. “Mi ta enkurashá tur mi koleganan músiko ku ainda no a bai Bakuna, pa nan bai hasi esaki, keremi ku promé ku bo kuminsá konta, bo no a yega ni tres, ya bo ta kla kaba. Tambe mi ke bisa nan ku, tur e historia nan ku ta bai rònt rondó di Bakunashon no ta kuadra ku realidat, ami ta prueba di esaki i no ami so, nan por bai puntra Reinier Lijfrock, paso e tambe a Bakuna. E ta bai hopi lihé i sin ningun klase di problema”. Mas aleu Vigilante farándula a mira riba e plataforma di FaceBook ku e legendario kantante kompositor areglista Gilbert “Gibi”Doran, tambe a Bakuna, esaki sigur ta un tremendo inisiativa di parti di Gibi Doran. Esaki ta pone ku awor diferente otro artista músiko tambe ta bai pasa nan Bakuna.