Fiskal Monique Dennaoui Simon a trese un punto interesante dilanti.

Nieuwe Haven—Ministerio Públiko ta prekupá ku un indikashon di oumento den kasonan inmoral. Esaki ta lokual fiskal di Ministerio Públiko, Monique Dennaoui-Simon a duna di konosé djabièrnè último.

Último tempu, en bèrdat riba ròl di korte tin hopi tratamentunan di kasonan riba intimidashon i inmoralidat seksual. Mayoria ta trata kasonan di hòmbernan mayor di edat ta tene relashon ku damitanan menor di edat. Fiskal di Ministerio Públiko Dennaoui a splika ku aserkamentunan riba ret sosial ta forma unu di e kousantenan den kasonan di inmoralidat.

“Mayornan mester tin mas kòntròl riba lokual nan yunan ta hasi riba ret sosial”, e la duna di konosé djabièrnè último. Ta trata di kasonan unda damitanan di entre 12 pa 16 aña ta tene relashon seksual ku predatornan seksual riba internèt. Lástimamente na Kòrsou tambe tin e predatornan ta kana rònt i ta buska kontakto ku damitanan menor di edat.