Un kantidat di shushi ku ta drenta Selikor ta kuminda fresku fresku.

Parera,– Esaki por dedusí for di data akumulá dor di Selikor i EcoVision den ’ultimo aña. Pa tempunan largu e diskushon prinsipal tokante shushi tabata kon pa siña pueblo di Kòrsou pa redusí, resiklá i alabes re-usá “shushi” promé ku tira esaki afó. Pero sifranan publiká último tempu ta dunando sufisiente indikashon ku kampaña di konsientisashon den direkshon di kompanianan industrial/komersial, lo ta muchu mas efektivo.

Mirando e importansha ku sektor di turismo tin riba nos isla, ta importante pa publiká e efekto ku Horeca(restorant, hotèl i café) tin riba nos maneho lokal di shushi. Aktualmente ta konosí ku gran parti di nos shushi ta wòrdu di stòrt riba nos lèntfil. Pero banda di e echo ku lèntfil ta daña nos medioambiente, estudionan ta remarkando ku for di 2014 nos lèntfil tin solamente 10 pa 15 aña mas pa bai.

Den 2023/2024 Selikor i EcoVision a ehekutá investigashon nan kaminda a diskubrí ku 6% di e kantidat di shushi ku ta yega nos lèntfil ta bini for di e sektor di Horeca. Alabes a resultá ku e kantidat di shushi ku ta sali for di e sektor aki ta suma 7.54 mion kilo, kaminda 20.3% di e 7,45 mion kilo ta orgániko. Esta den otro palabra 20.3% di shushi ku Horeca ta produsí ta kuminda tirá afó. Shushi orgániko for di e sektor aki por inkluí shushi di kurá di e establesementunan tambe, pero e mayoria shushi di kurá den Horeca ta drenta via limpiadónan di kurá i no via Selikor.

Un kalkulashon básiko di 20% di e 7.54 mion kilo di shushi por dedusí ku e sektor di Horeca ta bentando alrededor di 1.5 mion kilo di kuminda afó. Segun algun fuente, riba forma regular e tim di investigashon tabata habri sakunan di shushi i tabata keda sorprendé ku e kantidat di kuminda fresku ku tabata keda tirá afó. Alabes a remarká ku regular tabata haña sakunan yen ku pan i tabata haña sakunan yená ku kabaron kual simplemente no por a wòrdu bendí dor di e establesementunan.

Teniendo kuenta ku sifranan di averahe di kaloria i dieta por nota ku den teoria e 1.5 mion kilo di kuminda ku ta keda tirá afó por proveé sufisiente kuminda pa 3000 pa 4000 persona tur aña. SInembargo e data aki meresé mas atenshon mirando e oumento di preis den supermerkado i e kantidat di biaha ku nos minister di desaroyo ekonómiko mester a presentá den sala di parlamento pa debatí tokante oumentonan astronómiko di kuminda i kombustibel.

Na e momentunan aki Selikor den kordinashon ku EcoVisihon a ehekutá un investigashon pa kategorisá i analisá e sushinan ku ta yega nan nos lèntfil na Malpais. EcoVision a opta pa kategorisá e shushi den 8 kategoria. Di e 8 kategorianan básikamente por suma ku mester diferensha entre shushi di kas tantu gròf komo no gròf i shushi komersial kual ta inkluí shushi di hotèl, konstrukshon, shushi komersial gròf, shushi komersial no gròf i shushi komersial pikí riba ruta di selikor.

Unabes suma tur shushi di kas tantu gròf komo no-gròf por nota ku esaki ta suma 29%. I na otro banda shushi komersial inkluyendo shushi komersial gròf i no-gròf, shushi di hotèl, shushi di konstrukshon i shushi komersial pikí riba ruta di Selikor por nota ku esaki ta suma un total di 60%. E terser kategoria ta inkluí shushi di kurá kual ta 11%, pero den pasado shushi di kurá tambe tabata wòrdu kategorisá komo shushi komersial, segun e publikashon nan resien di Selikor.

Aktualmente tur ministerio lo bai risibí un kopia di e estudio ehekutá dor di Selikor i EcoVision pa asina determiná kon pa adaptá manehonan relatá na shushi i kon pa oumentá e efisiensia i efektividat di e proesesonan.