DEN HAAG/BRUSSEL–  E sosten finansiero ku estado hulandes a duna KLM no mester a keda aprobá pa Komishon Oropeo, segun hues Oropeo.

Gabinete a duna sosten di 3,4 miar euro na KLM den forma di fiansanan i garantia. Komishon Oropeo a duna aprobashon pa e sosten, pero esaki tabata robes. Den e desishon di Komishon Oropeo no a tene kuenta ku e sosten ku gabinete franses a duna partner Air France. Ku esaki e aprobashon no ta sufisiente argumenta segun e hues. E kaso a keda entama pa kompania Ryanair. Esaki no ta nifiká ku KLM mester paga e sosten bek. Korte di Union Oropeo ta bisa ku e paso ei lo okashoná hopi daño na ekonomia hulandes i sektor di aviashon.

Komishon Oropeo mester tuma un desishon nobo riba e sosten di estado hulandes na KLM. KLM a bisa ku e veredikto aktualmente no tin konsekuensianan pa e kompania i e sosten ku e ta haña. Un bosero di Komishon Oropeo ta informá ku e komishon ta bai studia e veredikto i su konsekuensianan, meskos ku ministerio di Finansas. Hues a pasa un strepi tambe den e aprobashon di sosten di gobièrnu portugues pa e kompania di aviashon TAP. Riba e sosten aki tambe e komishon mester tuma un desishon nobo. Ryanair a start diferente kaso kontra sosten di estado. Te ku resien el a pèrdè tur kaso. E kompania irlandes ta mira e sosten komo kompetensia inhustu pasobra e no ta haña sosten. Ku e sosten aki nan ta rekompensá inefisiensia, asina e kompania a bisa den un reakshon riba e verediktonan.