WILLEMSTAD – Presidente di Parlamento Charetti America-Francisca entretantu a manda e relato stipulá riba 24 di mei, dje reunion di Komishon Sentral di Parlamento di dia 8 di mei último, den kua a trata e proposishon di lei di Reino konteniendo aprobashon di e Tratado Internashonal entre e Reino Hulandes, na nòmber di Kòrsou, i e Repúblika Malta pa evitá impuesto dòbel i e prevenshon pèrdè impuesto relashoná ku entrada Valleta.

Durante e reunion Parlamentario Giselle Mc William di frakshon PNP a para ketu na e echo ku na 2018 pasá ta netamente frakshon di MFK a vota kontra e lei ku a hasi e régimen di impuesto mas transparente. Aparte di Mc William diferente otro miembro di Parlamento a hasi vários pregunta i a duna nan remarke tokante e tópiko.

Meta di e reunion tabata pa Komishon Sentral saka un relato dirigí na Tweede Kamer, ku minister di Asuntunan Eksterior di Hulanda Wopke Hoekstra mester kontestá. Ademas Parlamento a invitá un eksperto pa duna nan splikashon tékniko (technische briefing) i proveé mas informashon tokante e proposishon di e lei en kuestion i tambe otro tratadonan fiskal pendiente. Tabatin un diskushon basta amplio tokante e nesesidat/importansia di e splikashon tékniko. Oposishon ta haña ku e proseso no a kana na un manera deseá. Riba nan mes nan mester a bai buska teksto dje tratado pa informá nan mes. Di tur manera e komishon di Reino si tabatin tur informashon.

Sheldry Osepa di PNP tambe a para ketu na historia dje Lei di Reino pa evitá dòbel impuesto i a mustra mesora tambe riba importansia di bishitanan di trabou den eksterior. E ta haña hopi bunita i a pidi pa no lubidá ku ta for di 2011 a kuminsá sera kontakto ku Malta pa logra realisá e lei akí. Kòrsou a sera e kontakto durante un bishita di trabou na islanan Kaiman na e konferensia ‘Phase 1 Peer Review’. Malta a bai di akuerdo ku e petishon pa negoshá. A manda e teksto modelo dje tratado OESO pa otro komentá ariba i na òktober 2013 a tuma lugá un ronda di negosiashon kulminante na Malta. “Ki bunita ta pa no lubiá, pasó tin biaha e pueblo eifó ta puntra ta kiko boso a bai hasi. Mi ke a mustra unda tur kos a kuminsá na 2011.”

Ana Maria Pauletta di PAR no tabata nada kontentu ku e manera kon henter e proseso a bai, pa kana yega na e Lei di Reino. Parlamentarionan ku no ta den e komishon di Reino no a risibí e teksto dje tratado. Porlotantu nan mester a bai buska esaki riba website di gobièrnu hulandes. I e tin un poko problema tambe ku e echo ku tin algun kondishon i definishon diferente pa Malta kompará ku Kòrsou den e tratado. E ke sa pues di gobièrnu hulandes dikon tin e diferensia si ta papia di un tratado entre dos pais.

Den e tratado tin algun definishon general. Artíkulo 2 ta regla e impuestonan eksistente na kua e kombenio ta apliká. Pa Malta ta trata partikularmente di ‘income tax’ esta inkomstenbelasting, yamá ‘Malta-tax’,. Pero pa Kòrsou no ta e ‘income tax’ so, sino tambe ‘wage tax’ (loonbelasting), ‘profit tax’ (winstbelasting) i ‘dividend tax’ (dividendbelasting), yamá ‘Curaçao tax’.

Artíkulo 3 ta definí e término ‘national’, esta ken ta konsiderá komo un siudadano dje pais. Pa malta ‘national’ ta nifiká: kualke individio ku tin e nashonalidat di Malta; i kualke persona legal, sosiedat òf asosiashon ku ta derivá nan status for di e leinan vigente na Malta. Pero pa Kòrsou ‘national’ ta nifiká: kualke individio ku tin nashonalidat hulandes i ku por vota na Kòrsou si e ta mayor di edat i ta presente na Kòrsou. Sinembargo si e individuo no ta presente na Kòrsou, e mester a nase na Kòrsou òf tabata biba aki durante no ménos ku 5 aña. I ademas kualke persona legal, sosiedat òf asosiashon ku ta derivá nan status for di e leinan vigente di Kòrsou.

Pauletta: “Esei kemen ku ta ekskluí hende ku a nase na Kòrsou i a bai biba otro kaminda denter di 0 pa 5 aña, tur hende bou di 18 aña i tambe tur ku ta biba pafó di Kòrsou, for di ‘nationals’ di Kòrsou. Mester kòrda ku un tratado ta mas altu ku leinan lokal. E definishon akí ta konta pa lei lokal tambe?” Pauletta a splika su pregunta ku un  ehèmpel: un hende por kobra AOV (penshon) ora ku el a biba 15 aña na Kòrsou. Kemen si e definishon dje tratado ta konta pa lei lokal tambe, ta nifiká ku e periodo a baha bira 5 aña. “Esaki ta konta pa tur otro lei? Di unda a saka e definishon?”

I finalmente e ke pa splika artíkulo 16 insiso 3 dje tratado, ku ta papia di artista i boseronan. Segun Pauletta esaki ta regla ku e pais kaminda e artista/bosero a nase lo kobr’é impuesto ora ku e bai traha den eksterior. Kemen ora un lokal ku bai duna un presentashon na Malta, ta Kòrsou lo kobr’é impuesto i visevèrsa. E ke sa si ta asina OESO ta regla esaki.