Sigma Triumph tumando produktonan petrolero venezolano na Bullenbaai.

Bullenbaai— Importadónan di produkto petrolero na Hulanda of registrá na Hulanda, a uza teritorio i awanan di Kòrsou pa pusha tonelada di krudo venezolano drenta merkado hulandes.

E transpòrtnan a tuma lugá entre 2022 pa 2024, durante periodo ku tabatin embargo kontra di PDVSA i Gobièrnu Bolivariano. Hulanda a partisipá aktivamente den esaki. Gobièrnu Hulandes, “konsientemente” a uza e área di Kòrsou pa hinka krudo i produktonan petrolero den haf di Rotterdam. Na Febrüari ú2024, un transaborde riba laman den área di Kòrsou a sali yega Rotterdam. E kargamentu no tabatin un lisensia di OFAC.

Na Febrüari 2024, e tènker Sigma Triumph promé di sali pa Rotterdam, a risibi bishita di e tènker SeaWays Eagle.  E kontakto a tuma lugá den awanan di Kòrsou i pa ta eksakto na pirnan di Bullenbaai. Fotonan eksklusivo di Vigilante kompará ku e ruta di e tènkernan ta mustra i prueba esaki.

Na Febrüari 2024, SeaWays Eagle, konforme deklarashon di Refineria di Kòrsou, a deskarga produkto riba Sigma Triumph. Despues di a deskarga su kargamentu den Sigma Triumph, SeaWay Eagle mester a sali pa Trinidad. Segun e registro di SeaWays Eagle, promé di a yega Kòrsou e tabata na Aruba, pero segun su registrashon di transmitor, e no a drenta Aruba sino  a keda kologá pafó di kosta di Aruba, lantando e sospecho ku e tènker no a karga nunka na Aruba sino na un otro haf. Úniko haf di krudo mas serka entre Kòrsou i Aruba ta e refineria di Amuay na península di Paraguana, Venezuela. Pero fuentenan den agensia di barku na Kòrsou,  a señalá na Vigilante ku e produkto den tankinan di SeaWays Eagle, no tabata di Venezuela, pero por papia di un produkto klandestino, esta sin lisensia. 

Pa lokual ta trata registrashon, Sigma Triumph supuestamente mester a bini for di Cartagena Colombia i yega Kòrsou 17 di Febrüari 2024. Riba gráfiko a indiká ku e di dos tènker, SeaWays Eagle tabata banda di Sigma Triumph na Kòrsou, deskargando. SeaWays Eagle tambe ta yega riba 17 di febrüari i e dos tènkernan a keda señalá banda di otro.

Sigma Triumph, e di dos tènker, despues di a tuma e kargamentu di produkto abordo for di SeaWays Eagle, a la sali for di Bullenbaai ruta Rotterdam. E interkambio entre e dos tènkernan di krudo tin sufisiente informashon pa inisiá un sospecho ku riba Sigma Triumph tabatin produkto klandestino.  A keda konfirmá tambe ku SeaWays Eagle a yega Rotterdam i deskarga.