Back to Top
Vigilante banner image

Hulanda: despues di parlamentario ta ámtenar tei pèrdè salario


June 30, 2021 • 2 minüt pa lesa

Punda— Poko poko pero sigur, Hulanda ta pushando kabinete Pisas den ehekushon di COHO, via di Pakete di Pais. E siman aki, parlamentarionan mester bai na akuerdo pa baha nan salario ku 25% i Hulanda via Raymond Knops ke mira e akuerdonan será na 2020, ratifiká den Parlamento di Kòrsou.  Sino, finansiamentu no ta bini. Esaki ta lokual Javier Silvania a splika durante su rueda di prensa.

Unu dje desishonnan ku na 2021 mester keda ratifiká ta ehekushon di “Public Wage Bill”.  Manera menshoná, via di COHO, Gobièrnu di Hulanda ke mira un kòrtamentu den salario di ámtenar pa duna gobièrnu di Kòrsou mas espasio di por kumpli ku su debernan sin mester pidi fiansa riba merkado di kapital. Ainda e kòrtamentu na 12.5% ta riba mesa i por sali alrededor di 60 mion florin anual. Pa por yega na e suma eksakto, Hulanda ke introdusí e asina yama Public Wage Bill. E “Public Wage Bill” ta un standardisashon pa mantené un bahada struktural salario den sektor públiko i suavisashon di e kondishonnan di trabou pa e sektor.  Gobièrnu di Kòrsou, firmando na novèmber último  ta di akuerdo  pa introdusí e sistema tambe na Kòrsou. E tarea aki ta forma un parti integral di e Pakete di Pais komo sup sistema pa ehekushon di COHO. Segun Hulanda, e gastunan di sektor públiko di Kòrsou ta demasiado haltu kompará ku e área di Karibe.  Esaki pasobra e “Public Wage Bill” di Kòrsou ta demasiado haltu, den otro palabra ámtenarnan ta kobrando demasiado sèn. Mediante Pakete di Pais, Gobièrnu di Kòrsou a firma pa baha e salarionan kolektivo di ámtenar te na 10% di e Produkto Nashonal  Brutu Interno di Kòrsou.

Segun kalkulo di Hulanda, Gobièrnu di Kòrsou mester a paga 23.7 mion florin na overtaim durante 2020. Esaki ta lokual e reportahe final di finansa públiko ta indiká. E suma na overtaim ta 5% di e bolsa total pagá na salario públiko durante 2020. Mayoria di e overtaim ku gobièrnu paga ta prosedente for di e sektor hudisial, kuerpo di polis i sentro di detenshon i korekshon na Koraalspecht. Na 2020, salario di ámtenar a kosta gobièrnu un total di 442  mion florin. E suma no ta korespondé na lokual Cft a kalkulá na 528 mion florin.  E diskrepansha kisas por ta ku Cft a inkluí salarionan di fundashonnan supsidiá òf di kompanianan anónimo.

Entre 29 pa 32% di lokual Kòrsou generá na impuesto pa aña ta bai pa finansiá salarionan di ámtenar. Esaki ta lokual por konkluí fo’i sifranan finansiero someté den e rekuento pa 2020.  Kòrsou pro medio ta generá kasi 1.5 miar na impuesto kual mayoria ta for di impuestonan dirèkt i indirèkt. For di 1.5 miar anual na entrada, 442mion a bai na pago di salario lokual ta 29%. Pero pa 2020, debí na pronóstikonan negativo Kòrsou a generá ménos entrada. Konforme sifras di departamento di finansas pa 2020 Ontvanger di Kòrsou a kobra 1.2 miar so na impuesto. Na 1.1 miar di impuesto, 442 mion a bai na salario di ámtenar ta nifiká ku e porsentahe ta bira 36%.



Login