WILLEMSTAD – E situashon médiko di Kòrsou ta vulnerabel. Meskos ta konta pa e otro paisnan den Karibe. P’esei mes Hulanda ke sigui vigilá e situashon dje pandemia di COVID-19, apesar ku e no tin un impakto asina fuerte mas.

E ministernan di Salubridat, Bienestar i Deporte Ernst Kuipers, di Asuntunan Sosial i Labor Karien van Gennip i di Asuntunan Ekonómiko i Klima Micky Adriaansens di gabinete Rutte 4 a informá Tweede Kamer resientemente lo sigui e konseho di e asina yamá ‘Outbreak Management Team’ (OMT), ‘Bestuurlijke Afstemmingsoverleg (BAO), Maatschappelijk Impact Team (MIT) i e partnernan ehekutivo tokante e konsekuensianan di e desishonnan tumá a base dje konsehonan dje timnan akí pa loke ta trata desaroyonan rondó dje pandemia. E konseho pa loke ta trata Karibe ta, pa kontinuá e vigilansia den e region akí i lo keda den konsulta ku Rijksinstituut voor Volksgezondheid en Milieu (RIVM) i e gobièrnan dje paisnan den Karibe.

Aparte dje di 146 konseho di OMT, RIVM a emití un konseho pa loke ta trata e region di Karibe. RIVM ta indiká den su konseho ku e situashon médiko i epidemiológiko pa loke ta trata e pandemia di COVID-19 den Karibe ta den gran parti den liña ku e situashon aktual di Hulanda. Pa e islanan BES i CAS e variantenan ku ta sirkulá den kombinashon ku e probabel inmunidat amplio, ya no ta kondusí na un karga altu di enfermedat den e poblashon. Pa e motibu akí no ta konsiderá proporshonal pa mantené e medidanan spesífiko di COVID-19 den Karibe. “Sinembargo teniendo kuenta ku e tamaño chikí i limitá dje kapasidat di kuido, ta mustra den e konseho riba e situashon médiko vulnerabel den e islanna, manera e posibilidatnan di vigilansia limitá. RIVM ta rekomendá pa kontinuá ku e vigilansia eksistente i fortalesé esaki kaminda ta posibel. E islanan (ainda) no tin vigilansia di awa di riol òf un radar di infekshon. Esaki ta nifiká ku tin ménos informashon tokante e grado di e sirkulashon dje viro. Porlotantu tin un konseho diferente kompará ku Hulanda, pa loke ta trata e publikashon dje konseho di tèst. Den e kuadro di vigilansia ta mantené e konseho di hasi tèstnan mediante PCR pa un kantidat sufisiente di persona ku kehonan kompativel ku un infekshon respiratorio, i tambe mantené vigilansia germáfiko den e islanan, mediante mònsternan di PCR positivo.”