Nicolas Maduro: barkunan na kosta di Venezuela a hiba fuel oil venezolano Hulanda despues di blend na Kòrsou. Hulanda no ta rekonosé su gobièrnu pero ta dependé di produkto venezolano.

Den Haag—Gobièrnu di Hulanda, despues di elekshon na Venezuela a konta entre e paisnan ku a rechasá e gobièrnu di Maduro. Den nan deklarashon ta konkluí ku gobièrnu hulandes, nunka tabata muchu kontentu ku e maneho di Maduro.

Pero, Hulanda tin un problema. Krudo, awor ku tin embargo tambe riba Russia. No tin muchu opshon sino busk’é na Venezuela mes unda Kòrsou i Bullenbaai por sirbi gobièrnu hulandes bon. Esei netamente ta lokual ta tumando lugá tambe. Hulanda ta importando krudo “skondí” for di Venezuela i a uza Kòrsou pa esei tambe. Polítika di abestrus .

Tin prueba ku na Febrüari 2024, importadónan di krudo i negoshantenan petrolero na Hulanda a laga importá un kargamentu kontrabanda di produktor petrolero venezolano. Un tènker Sigma Triumph a sali for di Kòrsou pa Hulanda despues di a los for di Bullenbaai. Riba djadumingu 18 di Febrüari 2024, den oranan di mainta, na Bullenbaai, Sigma Triumph promé di sali pa Rotterdam, a risibi bishita di e tènker SeaWays Eagle. SeaWays Eagle, konforme deklarashon di Refineria di Kòrsou, a deskarga produkto riba Sigma Triumph. Despues di a deskarga su kargamentu den Sigma Triumph, SeaWay Eagle mester a sali pa Trinidad.

Segun e registro di SeaWays Eagle, promé di a yega Kòrsou e tabata na Aruba, pero segun su registrashon di transmitor, e no a drenta Aruba sino  a keda kologá pafó di kosta di Aruba, lantando e sospecho ku e tènker no a karga nunka na Aruba sino na un otro haf. Úniko haf di krudo mas serka entre Kòrsou i Aruba ta e refineria di Amuay na península di Paraguana, Venezuela. Pero fuentenan den agensia di barku a señalá na Vigilante ku e produkto den tankinan di SeaWays Eagle, no tabata di Venezuela, pero por papia di un produkto klandestino, esta sin lisensia. 

Pa lokual ta trata registrashon, Sigma Triumph supuestamente mester a bini for di Cartagena Colombia i yega Kòrsou 17 di Febrüari. Riba gráfiko a keda konfirmá ku e di dos tènker, SeaWays Eagle tabata banda di Sigma Triumph den oranan di mèrdia Na Bullenbaai i Vigilante tin e foto. SeaWays Eagle tambe ta yega riba 17 di febrüari i djadumingu e dos tènkernan a keda señalá banda di otro. Despues, SeaWays Eagle ta los for di Bullenbaai i sigui su ruta pa Trinidat di Tobago, Galeota Point, Pa lokual ta trata Sigma Triumph, despues di a tuma e kargamentu di produkto abordo for di SeaWays Eagle, ayera i sali sora for di Bullenbaai ruta Rotterdam. E interkambio entre e dos tènkernan di krudo tin sufisiente informashon pa inisiá un sospecho ku riba Sigma Triumph tin produkto klandestino, den e kaso aki fuel oil, rumbo pa Hulanda.