Back to Top
Vigilante banner image

Hulanda prekupá ku Bon Kondukta interno na Banko Sentral


January 8, 2021 • 2 minüt pa lesa

Skalo— Gerensha di Banko Sentral, Richard Doornbosch ta prekupá ku e aplikashon di Bon Maneho i Kondukta interno na Banko Sentral. Huntu ku Erwin Ellen, kende tambe a bini for di Hulanda ta trahando riba e ouditorio organisatorio i investigashonnan nesesario. Manera Vigilante ya a publiká, e sondeo na Banko Sentral riba bon kondukta ta forma parti di COHO.

Hulanda ke ehekutá un evaluashon di maneho konforme reglanan di Bon Maneho i Práktika. Esaki mester a tuma lugá promé ku 15 di desèmber último. Esaki ta lokual e último adaptashon na e Pakete di Pais a menshoná tambe.  Pa Yanüari i Febrüari  Banko Sentral, CBCS lo keda someté na un evaluashon di Bon Kondukta riba Gobernashon konforme indikadónan di Bon Práktika. For di den e Akuerdo di Kresementu, Raymond Knops a mustra su mal kontentu riba e maneho na Banko Sentral. E Akuerdo a menshoná klaramente ku tin duda riba aplikashon di e un Bon Kondukta pa Bon Gobernashon. A referí dirèkt tambe na e prekupashon pa e situashon na Ennia i tambe Banko Giro. Den e pakete komun, pa lokual ta trata e akuerdonan genériko pa kada pais, for di desèmber Kòrsou mester tin algu konkreto riba papel.

A keda komprobá ku na nivel di gerensha na dos okashon informashon a sali  ku a okashoná hopi daño na e instituto pero tambe trese deskonfiansa na e mundu bankario. Prinsipalmente Giro a sufri un daño ireparabel pa esaki. Eugene Rhuggenaath a menshoná ayera ku entretantu Hulanda a finansiá e pèrdida di tenedónan di kuenta na Giro.  Na yüli di 2019, e instituto a manda un komunikado di prensa unda a splika ku direktor den hunta di maneho, Matroos Lasten a risibí un atvertensha pa violá reglanan di integridat di e banko. Un otro aspekto ta e situashon di Ennia. Presidente di Hunta di Komisario, Etienne Ys tabatin relashon di trabou ku Hushang Ansary, kende aktualmente CBCS ta den prosedimentunan hurídiko di kasi 850 mion florin pa sakeo na Ennia



Login