AMSTERDAM—Na ougùstus Hulanda lo surpasá 18 mion habitante, segun Ofisina Sentral di Estadistika CBS.

Un pronostiko di 2016 a indiká ku e sifra aki mester a keda alkansá den 2034. Aktualmente Hulanda tin 17.986.000 habitante. E populashon ta konsistí di hendenan ku ta inskribí na Hulanda, inkluso refugiadonan ku permit di estadia. Hendenan ku ta ilegal den Hulanda no ta den e konteo. Esaki ta konta tambe pa solisitantenan di asilo ku ainda no ta inskribí den na munisipionan. E límite di 17 mion habitante a keda alkansá den 2016. CBS a kalkulá e tempu ei ku e siguiente mion lo ta un realidat den aña 2034. Pero faktornan imprevisto a aselerá e proseso. Ora hasi un pronostiko pa futuro ta basa e sifranan riba pasado, kombiná ku e situashon aktual, i ekstrapolá pa futuro, segun CBS. Segun CBS e sirkustanshannan a kambia, i mester ahustá e sifranan.

E guera na Ukraina ta hunga un ròl. Hopi habitante a hui pa violensia, loke a kousa un oumento den kresementu di poblashon den 2022. E espektativa di bida tambe a oumentá, ku eksepshon di temporada di corona. Kresementu di poblashon no ta un liña ku ta oumentá konstantemente. Pasobra e sifranan tin hopi faktornan insigur, CBS ta ahusta e pronostiko tur aña. Den esaki CBS ta tene kuenta ku e desaroyonan di mas resien. Asina ta pronostiká ku imigrashon anual lo baha den próksimo añanan mientras emigrashon lo oumentá. CBS ta pronostiká ku den 2037 Hulanda lo tin un populashon di 19 mion habitante.