Durante su bishita na Kòrsou, Knops a manda un karta pa Tweede Kamer ku ta aprobá finansiamentu pa alimentashon

PUNDA- E pandemia di Covid-19 a trese desafionan grandi kuné pa loke ta trata e situashon ekonómiko i finanserio di Aruba, Kòrsou i Sint Maarten. Echo ta ku pobresa na e islanan aki a oumentá debí na Covid-19. Pa e motibu aki, for di mei 2020 Hulanda a pone rekurso finansiero disponibel pa yuda esnan mas afektá dor di e pandemia ku alimentashon.

Den un karta skibí pa sekretario di estado, señor Raymond  Knops, e ta anunsiá ku e programa inisial di ayudo di alimentashon pa medio di Krus Kòra lo no kontinuá mas, pero lo remplasá esaki ku un programa stipulá pa outoridatnan lokal di e islanan. Pues Hulanda ta kontinuá finansiamentu di ayudo pa komestibel, solamente kada gobièrnu mes ta responsabel pa implementashon di un programa ku ta sòru pa esnan den mas nesesidat risibí yudansa.

Gobièrnu di Kòrsou a tuma kargo di e ayudo pa alimentashon, 1 di mei 2021. Ministerio di Desaroyo Sosial, Trabou i Bienestar (SOAW) ta e instansia ku awor ta enkargá ku maneho di e finansiamentu stipulá pa ayudo di esnan den nesesidat. Promé di yüni 2020 e programa nobo a start bou di maneho di SOAW. Manera a keda anunsiá anteriormente e karchi di Krus Kòra lo wòrdu eliminá, en kambio SOAW lo pone fondo adishonal pa alimentashon riba kuenta di personanan registrá serka nan. Kòrsou lo risibí un supsidio total di 2.4 mion euro for di Hulanda pa e programa di ayudo di alimentashon, ku lo kubri e periodo te ku 1 di òugùstùs 2021.

Hulanda lo kontinuá finansiamentu, total di 3 mion, pa ayudo di alimentashon pa personanan indokumentá na Kòrsou te ku 1 di òugùstùs 2021. Despues di 1 di òugùstùs 2021, SOAW lo tuma responsabilidat di e grupo aki riba nan mes. Organisashon Internashonal di Migrashon (IOM) ta keda enkargá ku yudansa pa personanan indokumentá na Kòrsou.

Kontinuashon di programa di ayudo pa alimentashon

Ounke turismo ta mustra di ta rekuperando, nesesidat pa ayudo ku alimentashon aun ta grandi. Pa e motibu aki, gabinete hulandes a disidí pa pone un total di 14.1 mion euro disponibel pa finansiá fase sinku (5) di ayudo pa alimentashon ku mester wòrdu parti entre Aruba, Kòrsou i Sint Maarten. Ku e fondo adishonal aki, e programa di ayudo por kana te ku 30 di sèptèmber 2021.

For di komienso di e programa di ayudo pa alimentashon na mei 2020, gabinete hulandes a pone 85.4 mion euro disponibel pa ayudo na e islanan Aruba, Kòrsou i Sint Maarten. Sèptèmber 2021, gabinete lo disidí si ta nesesario pa kontinuá ku finansiamentu pa e programa di ayudo pa alimentashon despues di 1 òktober 2021.

Ku rekuperashon di turismo i ekonomia na bista, Sekretario di Estado Knops ta spera ku e kantidat di personanan ku ta dependé di ayudo lo redusí. Na mes momentu, Hulanda ta trahando ku e islanan pa fortalesé ekonomia di un manera sostenibel, pa prevení ku mester di programanan di ayudo den futuro.