Bionario: promé minister di Barbados, Mia Mottley a demanda 5 mil mion dòler estado unidense pa dañonan okashoná na Barbados pa ehekushon di sklabitut.
Skalo— Pagando algun depchi, gobièrnu di Hulanda ta sali barata for di e dañonan okashoná pa sklabitut.
Polítikonan i mandatarionan na Willemstad durante IPKO a hasta aseptá pa laga e hulandesnan oropeo pone un museo di katibu na Hulanda. Organisashonnan na Kòrsou, a haña finansiamentu for di Den Haag pa tene tur hende ta kontentu.
Na Kòrsou, organisashonnan ta partisipá ku Hulanda. Den luna di Òktober na 2024 a tuma lugá un kontroversia bastante ferfelu i kuestioná rondó di Tula. Representashon di Hulanda, a organisá un dia di lektura ku yama “Soño di Tula”. Ta trata di un lektura di Katibu Tula, den kas di Hulanda na Skalo. Segun avisonan a sirkulá, Hulanda ta splika ku e lekturanan ta den kuadro di rehabilitashon di Tula. E splikashon a informá ku riba 3 di Òktober 2024 ta hasi un aña ku “gobièrnu hulandes a rehabilitá Tula. Rehabilita?
Ta inimaginabel ku Tula por tin un “soño” den kas di pasado ku tabata kastigá i asesiná katibunan na Kòrsou, miéntras na Kenepa tin un Museo Tula, konstruí i manehá spesialmente pa rekordá Tula. Último dos aña, e tim di Jean Henriquez, kende tambe mester duna presentashon, a traha duru pa logra rekuperá maneho di e Museo i ta trahando duru pa Museo Tula bira un instituto pa sigui desaroyo i herensha di Tula. A tene un lektura i presentashonnan riba “Soño di Tula” den kas di representashon di Hulanda na Skalo. E presentashonnan mester a tuma lugá na Kenepa Banda Bou, den besindario unda Tula a inisiá su lucha te ku awe Hulanda por ta papiando di rehabilitashon. Den kas di Hulanda, na Skalo sigur no ta unu adekuá!
Gobièrnu di Barbados kontrali ta demandando 5 mil mion dòler di daño. Na Kòrsou e kompensashonnan no ta surpasá ni 5 mion dòler. Hulanda, a sali barata for di Tula.