DEN HAAG–Kompará ku otro paisnan oksidental manera Belgika i Alemania, Hulanda ta kumpli menos bon ku derechonan di mucha.

E deklarashon aki ta hasí dor di e organisashon internashonal di derecho di mucha “KidsRights”, kual a hasi un investigashon mundial huntu ku “Erasmus University Rotterdam”. Riba e lista di 194 pais, Hulanda ta na di 19 lugá. Un lugá mas haltu ku aña pasá, pero bou di e paisnan bisiña Belgika ku ta na di 8 lugá i Alemania na di 4 lugá. KidsRights ta mira problemanan den entre otro kuido hubenil i protekshon hubenil hulandes, pobresa infantil i falta di kuido pa muchanan den sentronan di solisitante di asilo. KidsRights Index ta un ordenansa mundial ku anualmente ta midi e estado di derechonan di mucha den áreanan di bida, salú, edukashon, protekshon i tambe kreashon di un ambiente faborabel pa derechonan di e mucha.

E aña anterior Hulanda a baha for di 4 lugú bai para na di 20 lugá. Kosnan ta bayendo menos bon pa muchanan na Hulanda ku añanan anterior, spesialmente riba tereno di kuido médiko, segun KidsRights. E organisashon ta preokupá, entre otro, ku partisipashon den e programa nashonal di bakunashon ta bahando i ku e kantidat di bakunashon kontra sarampi awor ta bou di 90%. Estudionan resiente a mustra ku e kambio den aktitut di mayornan pa ku bakunashon ta parse di ta influensiá e bahada di e kantidat di bakunashon. Akshon di gobièrnu pa purba di bira e tendensia aki bèk ta sumamente deseabel. Apesar ku ainda Hulanda ta destaká bon pa ku e proseso di awa pa bebe, KidsRights ta kere ku ta importante pa keda ku enfoke riba esaki. Asina ta protehá rekursonan di awa i salú humano efektivamente. Atendé ku supstansianan kontaminá i kumpli ku direktivanan Oropeo, reformanan agrikultural, mehorashon di tratamentu di awa di riool i tambe di vigilansia ta nesesario. Segun e presidente di KidsRights, Marc Dullaert, e gabinete nobo mester pone man na obra. “Un pais ku no ta kuida su yunan ku ta vulnerabel manera mester ta, tin un problema grandi. Gabinete Schoof mester duna prioridat den su planifikashon “op weg naar prinsjesdag” na e generashon aktual i tambe futuro di muchanan i hobennan vulnerabel. E aña aki, pa prome biaha, a wak kambio di klima tambe. Segun e organisashon di derechonan di mucha, Hulanda ta bayendo bon pa motibu di un “polítika ambisioso di klima”. Tambe tin puntuashonnan haltu riba edukashon, bida i protekshon. E último aki tin di haber ku bon registrashon ora di nasementu i e kantidat abou di mamanan adolesente.