Back to Top
Responsive image
E korant di pueblo

IMF ta pronostiká ku turismo lo subi bèk te na 2022 pa 2024


March 5, 2021 • 2 minüt pa lesa

Steven Martina: sea e bini bek komo minister di Ekonomia òf no, Kòrsou ta den problema grandi pa rekuperá su turismo.

Punda- E pronóstikonan di IMF, durante nan último sondeo na Kòrsou no ta muchu alentador. Segun organisashon monetario internashonal, Kòrsou su turismo lo sigui plat durante 2021 pa kuminsá oumentá leve na 2022 i yega tòp bek te na 2024.

Sin a duna muchu aklarashon, nan a duna nan pronóstiko abase di porsentahe di kresementu. Segun IMF pa 2020 turismo lo akapará 38% di lokual a risibi na bishita durante 2019, pa 2021 esaki lo ta 38% tambe, pa 2022 lo bira 60%, 2023 80% i te ku 2024 Kòrsou lo yega 100% di e nivel na 2019. Pero, IMF no a inkorporá e variabel si Hulanda duna konseho di biahe pa islanan den Karibe. Esaki ta kambia tur pronóstiko.

Rutte òf Hulanda su siguiente konseho di biaha mester konsiderá Kòrsou. E desishon lo afektá turismo na Kòrsou te ku mart desèmber 2021. Kòrsou ta den un polémika hopi serio. Di un banda, por lo ménos 16 mil ta dependé di turismo i na otro banda e nivel di infekshon na Hulanda ta hunga un ròl. Ekspertonan  na Ofisina di Turismo i na MEO, ta prekupá. Prinsipalmente na CTB, pasobra lógikamente sifranan di 2020 kompará ku 2019 ta notifiká un problema serio. Gobièrnu ta risibiendo ménos entrada na divisa i na impuesto riba benta (OB). Turismo komo pilar prinsipal pa desaroyo ekonómiko a tambaliá. Na 2019, segun e modelo Turístika ku MEO ta apliká, te ku sèptèmber gobièrnu a kobra 95 mion florin na OB den turismo. Mester tene kuenta si ku tin un diskrepansha di 10 mion florin na entrada di impuesto riba kamber pa estadia na Kòrsou. Esei ta un diferensha entre e modelo Turístika i sifranan real. Na promé lugá, Turístika ta asumí ku tur okupashon registrá ta resultá den pago di impuesto. Esei no ta bèrdat. Mayoria alokashon ku no ta hotèl, no ta pagando nan impuestonan riba kamber. Esaki ta un bataya ku tantu CTB, Ontvanger i MEO ta bringando pa hopi aña sin por bini kla kuné.

E sifranan pa 2020 no ta nada kompará ku 2019, lokual ta mustra klaramente ku pa 2020 ni tampoko 2021 Kòrsou no por sigui konta riba turismo komo pilar ekonómiko. Esaki ta un lástima pasobra tur sifra te ku sèptèmber 2019 tabata mustra oumento den turismo na Kòrsou. Kompará ku 2018, te ku sèptèmber2019 tabatin un oumento di 11% den kategoria di turismo di estadia. Un total di 346.410 turista a keda te ku sèptèmber 2019 kompará ku 311.334 na 2018 durante mesun periodo. Di esakinan pa lokual ta trata e tòp 6 merkadonan, 41% tabata di Ulanda, 17% di Estádos Unídos, 6% for di Colombia, 5% for di Canada, 5% for di Alemania i 3% for di Brazil.

Login