Willemstad—– Ministerio di Desaroyo Ekonómiko (MEO), huntu ku minister Cijntje, ta kontinuá ku den e trayekto pa trese nanishinan tur den e mesun direkshon na kaminda pa logra implementashon di e Strategia Nashonal di Eksportashon pa Kòrsou (NES).

Na inisio di e siman tras di lomba, e minister huntu ku su ministerio a hasi entrega di un ehemplar di e NES na direktor di Banko Sentral di Kòrsou i St. Maarten i awor a toka turno na presidente di parlamento di Kòrsou, sra Charetti America- Eduarda. Representantenan di sektor finansiero na Kòrsou tambe a risibí un kopia di e NES i un presentashon ekstenso di e vishon di e Strategia akí i kiko esaki ta bai nifiká pa e futuro prosperidat di nos pais. Ta trata aki di e institutonan Curaçao International Financial Services Association (CIFA), International Banking Association (IBA) i Curaçao International Financial Center (CIFC). E sektor finansiero a reakshoná sumamente positivo riba e kontenido i vishon di e Strategia Nashonal pa Eksportashon i ta disponibel pa duna nan aporte den e trayekto di implementashon.

Kòrsou su Strategia Nashonal pa Eksportashon, ta deskribí di ki manera nos por ban traha na reforsá sektornan den nos ekonomia ku tin potensial pa eksportashon i ta presentá un plan di kambio integral dirigí riba pilánan nobo di ekonomia. E meta ta, pa konstruí prosperidat pa nos pais. Ta un echo ku ya pa sigur 30 aña, nos ekonomia a bin ta dependé di e pilánan tradishonal i esakinan a bin ta sirbi nos enormemente. Sinembargo, si nos ke mantené e prosperidat di Kòrsou, nos mester enfoká pa ekspandé i diversifiká nos fuentenan di prosperidat. 

E Strategia Nashonal pa Eksportashon ta hasi distinshon di seis sektor di prioridat.

Sektornan di prioridat

No solamente pa motibu di nan potensial pa eksportashon, pero tambe dor di e forsa di  konekshon entre e sektornan akí ku ta hasi Kòrsou su ekonomia fuerte i resiliente; kla pa enfrentá retonan di futuro.Ta trata aki di e sektor di bio-ekonomia blou, e industria kreativo, servisionan di enseñansa, servisionan finansiero, servisionan di informashon teknológiko i servisionan di haf i e sektor marítimo.

MEO su enfoke awor ta pa traha huntu ku e sektornan akí i komunidat kompletu riba implementashon di e Strategia Nashonal pa Eksportashon akí den e próksimo 5 añanan. Pa e implementashon akí ta un éksito, nos mester realisá ku esaki no ta un Strategia di Gobièrnu sino di nos pais kompletu. Ta nesesario pues pa por konta ku e kolaborashon i esfuerso di nos tur pa berdaderamente logra e vishon di e Strategia Nashonal akí kual ta – Kòrsou, kaminda negoshinan ta prosper

Bo tambe ta interesá pa lesa e Strategia Nashonal di Eksportashon pa Kòrsou? Klek aki pa ‘download’ esaki. Bo ta deseá di lesa e dokumento kompletu? Tuma kontakto ku MEO via di e Facebook di Ministerio di Desaroyo Ekonómiko.