Robin Martina: den un entrevista ku Vigilante algun luna pasá Robin Martina, presidente di BVA, e asosashon di importadónan a mustra nan prekupashon.

Punda— E sistema di OB agregá, tin importadónan di Kòrsou bastante prekupá. Kombiná ku un oumento den tasa di inflashon, por spera kambionan den aktitut di kompra na Kòrsou. E Asosashon di Importadónan na Kòrsou, a tene algun seshon pa trata na atendé e problemátika. Inkluso a sinta ku minister di Asuntunan Ekonómiko i di Finansas Públiko.

Importadónan na Kòrsou tin hopi aña ta tratando na solushon a e problema. Nan ta prekupá na momento e produkto yega den rèki e ta bira impagabel pa sierto gruponan di entrada. Kosto di bida na Kòrsou a oumentá kompará ku 2021. Aparte di un oumento den inflashon, e índise di preis general tambe a oumentá durante 2022 kompará ku 2021. Esaki ta lokual por konkluí for di sifranan kompilá pa Ofisina Sentral di Statistik (CBS). Si kompará e periodo di e último 12 luna te ku desèmber 2022, ku mes periodo un aña anterior, ta resultá ku preisnan na averahe a subi ku 7,4 porshento: e CPI promedio di 12 luna a desaroyá di 106,0 na desèmber 2021 pa 113,8 na desèmber 2022

E sifranan aki ta indiká ku e mantenshon di kosto di bida pa konsumidó durante luna di novèmber 2022 ta 8,3% mas haltu kompará ku e mes un luna na aña 2021. E kategorianan ku a kontribuí mas tantu na e subida aki ta kuminda (15,2%), muebel i aparatonan doméstiko (12,6%), transporte i komunikashon (11,2%), i bibida i produktonan di tabako (10,9%).. E sifranan aki ta indikando un problema grandi pa importadónan. Prinsipalmente e oumento den kategoria di kuminda na 15% ta un motibu serio di prekupashon. Nan Barbados, gobièrnu di e isla a laga nan Banko Sentral hasi un investigashon nashonal pa determiná kiko ta pasa ku e forsa kolektivo di kompra.

Den un komunikado di Banko Sentral, tin desaroyonan similar ta tumando lugá. Segun CBCS, e oumento adishonal den tasanan di interes durante 2023 lo ta mas moderá kompará ku 2022, limitando pèrdidanan den e portafolionan eksistente. E ophetivo primario di CBCS komo banko sentral no ta pa hasi ganashi. E ta pa garantisá un tasa di kambio fiho entre e florin i dòler Merikano. Pa esei, CBCS  tin komo nan meta pa preservá likides di e dòler merikano apesar ku e por afektá ganashi a korto plaso.

Aktualmente e interes na Oropa ta 2,5%. ECB ta subi e interes pa frena e inflashon, ku for di komienso di e guera na Ukraina a subi drástikamente. Den desèmber 2022 tambe e banko a subi e interes ku 0,5%. Dos luna pasá a bini 0,75% aserka. Ku  e oumento aki bankonan komersial manera ABN AMRO ku ING na Hulanda ta haña mas interes si nan warda plaka na banko sentral. Asina banko sentral ta spera ku bankonan subi interes pa klientenan tambe. Esaki ta hasi fiansanan ménos atraktivo. ECB ta spera ku ta kumpra ménos asina preisnan stòp di subi. ECB no ta e úniko banko sentral ku a subi su interes. Banko di Inglatera tambe a subi su interes miéntras banko sentral merikano tambe a subi su interes ku 0,25%.  Si Banko Sentral, CBCS, sigui e kurso di su kolega oropeo, lo tin ménos fiansa riba merkado lokal pa por invertí òf kumpra, tratando na baha e nivel di inflashon ku kisas durante último kuartal di 2023 por tin konsekuenshanan serio pa ekonomia di Kòrsou. Un otro aspekto importante pa trata na frena ta e OB agregá ku alabes ta trese un inflashon fiktisio sin base di balor.