Covid: Pik Pisas ta yega Urna na 2021.
Punda—Un enkuesta bou di 288 persona registrá riba e whatsapp channel di Vigilante, ta indikando un partisipashon haltu na elekshon 2025.
10% for di un kantidat di 2800 miembro riba e kanal di whatsapp a partisipá na e enkuesta. Un total di 288 miembro a duna kontesta for di kual 244 a konfirmá di lo partisipá na elekshon 2025 (86%). 44 a ekspresá di no partisipá. Ta trata di populashon di 10% for di e komunidat di 2.800, lokual no ta representativo pa tuma konklushonnan sientífiko, pero por duna un indikashon sin base ku na e momentonan aki tin interes mas amplio pa elekshon 2025 kompará ku 2024.
Segun Konseho Supremo Elektoral, un kantidat di 4.214 hende ménos por partisipá na elekshon 2025 kompará ku elekshon 2021. Esei ta lokual sifranan di Registro Sivil ta señalá. Riba 24 di Desèmber último, Konseho Supremo Elektoral a risibi e sifranan konkreto ku Registro di Votadó ta konta ku 111.932 persona ku derechi pa voto. Na 2021 e kantidat tabata 116.146. Tabata trata di 53.605 hende hòmber i 62.541 hende muhé. Tabatin un partisipashon di 74%. Un kantidat di 15 partido tabata por a partisipá for di 23 ku a inskribí na entrega di lista.
Un informashon interesante ta e bahada den kantidat di hende siudadano ku derechi pa vota. Na elekshon 2017 e kantidat tabata 120.430, na 2021 116.146 i pa 2025 e kantidat a baha te na 111.932. Esaki ta un bahada di kasi 8% kompará ku 2020. Ainda no tin un splikashon práktiko pa e bahada, pero no mester ekskluí embehesimentu komo unu di e faktornan determinante. Tambe e posibilidat di emigrashon di hóbennan pa Hulanda durante i despues di Covid tambe por ta un posibilidat.
Na 2021, tabatin un partisipashon di 74% lokual a pone e repartishon pa eskoho (kiesdeler) na 4.000 voto. Si elekshon na 2025, mantené mesun % di partisipashon òf un partisipashon den su besindario, e repartishon di eskoho ta keda kasi mesun kantidat di voto na 4.000.. Pero, si e partisipashon na elekshon 2025, oumentá, e repartishon di eskoho (kiesdeler) ta bira mas haltu. Por ehèmpel, si resultá ku elekshon 2025 tin un partisipashon di 86% for di un populashon di 112 mil votadó, e “kiesdeler” pa elekshon 2025 ta bira kasi 4.500 voto.
Un otro faktor ku por hunga un ròl pa mas votadó bai urna, tabata e situashon di COVID na 2021. Hopi siudadano a skohe pa no sali kas debi ku tabatin menasa di Covid.