Back to Top
Vigilante banner image

Indikashon ku Caribbean Petroleum Refinery a despistá RdK


December 9, 2022 • 3 minüt pa lesa

Splika: kabinete Pik Pisas, ta konfrontando problema pa maneho di Refineria Isla, mientras e promé entrega di fuel oil na Bullenbaai por duna Kòrsou bastante problema den e komunidat petrolero.

Parera—Segun direktor di Refineria di Kòrsou, Patrick Newton e kargamentu di 600 mil barí di fuel oil den Bullenbaai, tin outorisashon via di un lisensia di OFAC. Newton den un deklarashon na Vigilante konfirmá ku RdK a laga chek tur kos promé aseptá e karga di fuel oil.

Si, Caribbean Petroleum Refinery (CPR) tabatin un lisensia di OFAC, sea direkto òf indirekt ku kompanianan ligá lo no tabatin niun problema. Un otro eksonerashon ta e posibilidat di kompensashon di debe, manera CPR a splika den nan komunikado. Refineria di Kòrsou, riba su mes no tabata partísipe di e entrega ku a bini via e barku Colon, sino tabata CRU mester a kordiná e parti logístiko ku entre otro Caribbean Petroleum.

Te ainda no ta konosí unda Refineria di Kòrsou a laga chek si e kargamentu di fuel oil den Bullenbaai tabata kontra di sanshon imponé pa Estádos Unídos. Si Newton a konfirmá na Vigilante ku tabatin lisensia di OFAC, e informashon mester a bini for di diferente direkshon, sea ta CPR, CRU, Knob Trading of UPC, ámbos último ta kompanianan registrá na Panamá, envolví den e kargamentu. “Es decir” den e kargamentu di fuel oil, tabatin 4 kompania envolví. CRU i CPR di Kòrsou, UPC i Knob di Panamá.

Segun e struktura logístiko ku CPR di Kòrsou a traha kuné, tabata Knob Trading SA mester a perkurá pa dokumentashon legal miéntras UPC tabata esun kende a risibi e fuel oil komo repago di un debe ku PDVSA tin na UPC. Den e struktura logístiko pa Colon por a entrega e fuel oil den tankinan di Bullenbaai, mester tabatin un lisensia di OFAC, kual ta entidat estado unidense riba kòntròl di transakshonnan riba aktivonan ekonómiko finansiero.

Pero awor tin duda di en bèrdat tabatin un lisensia di OFAC. Riba 18 di novèmber, e bufete di abogado na Miami, riba súplika di Caribbean Refinery a entrega un konseho di e kargamentu di fuel oil na Kòrsou na sèptèmber último, tabata kontra di sanshonnan imponé pa gobièrnu estado unidense i OFAC. Mester puntra ta dikon, CPR a manda pidi un konseho miéntras Newton di Kòrsou a konfirmá na sèptèmber ku tin un lisensia di OFAC pa entrega e fuel oil na Bullenbaai.

Esaki ta un indikashon bastante konkreto, ku CPR no tabatin un lisensia den nan man sino nan lo no a manda buska un konseho hurídiko. E lisensia di OFAC, ta sufisiente pa por prueba nan outorisashon estado unidense pa por a saka e fuel oil i manda Kòrsou. Si resultá bèrdat, Patrick Newton i Kabinete Pik Pisas a tuma un riesgo grandi pa Kòrsou riba kumplimentu den areglonan di OFAC. Pasobra si e fuel oil na Bullenbaai, no tin un asertashon di OFAC, ta bira difísil pa sigui distribuí e fuel oil pa otro partinan di mundu.

Konfirmá: segun Patrick Newton a laga kontrolá tur kos promé
ku kargamentu di fuel oil a yega Kòrsou.

E fuel oil di UPC den tankinan di Bullenbaai no ta propiedat di Venezuela i tampoko di PDVSA. Tabatin un transformashon di propiedat riba e fuel oil, despues di a sali for di teritorio venezolano i PDVSA no ta risibi benefisio for di e pagonan, sino simplemente ta pagando su debenan na UPC. Den e relashon entre kompanianan, CPR tin un kontrakt ku CRU di Kòrsou i Knob Trading di Panamá. Den e kontrakt entre Knob i UPC, tin un klóusula menshoná pa obligá Knob konsiderá tur areglonan internashonal i atendé kumplimentu.

Login