DEN HAAG—Kompania di teknologia hulandes inkonsientemente ta bende nan teknologia na kompanianan di servisio di inteligensia ruso establesé den Hulanda.

Asina un bosero di ministerio di Defensa a konfirmá despues di deklarashonnan di Jan Swillens, hefe di Servisio di Inteligensia i Seguridat Militar (MIVD). E ta atvertí den FD ku e sektor tekonologiko avansá hulandes sin sa ta suminstrá komponentenan krusial pa material di guera na Ukraina. Segun Swillens servisio sekreto ruso a lanta desena di kompania ku ta opera komo empresanan fiktisio pa evadi sanshonnan oksidental. E kompanianan ta kumpra teknologia na Hulanda pa despues pasa esaki di kontrabanda pa Rusia ku proposito militar. Segun direktor di MIVD e praktikanan aki ta eksistí for di tempu di anekshon ruso na Krim den 2014, pero a oumentá awor ku e guera na Ukraina. E ta hasi yamada na kompanianan di tekonologia avansá na Hulanda pa hasi investigashon mas profundo riba nan klientenan i puntra ken ta e usuarionan final di e produktonan. MIVD a informá minister di Defensa Ollongren algun luna pasa di e rutanan di kontrabanda. E ministerio a reakshoná bisando ku MIVD no tin outoridat pa stòp intentonan di evadi sanshonnan. Si nan tin sospecho, mester envolví Duana of ministerionan di Asuntunan Ekonomiko i Asuntunan di Eskterior. Huntu ku e kompanianan por tuma akshon. Tambe a kompanian por meldu kontrabanda na Sanctieloket Rusland di RIjksdienst Ondernemend Nederland (RVO). Kompanianan di teknologia avansá hulandes ta den e tòp internashonal di e sektor ku NXP i ASML. Nan ta eksportá produktonan pa aplikashon sivil i militar. Banda di microchips ta trata di piesanan di vehikulonan, aparatonan di komunikashon i teknologia maritime. Hulanda tin un industria bionario riba e terenonan aki ku Akzo i VDL. Fin di mart Hulanda a deportá 17 diplomatiko ruso pasobra nan tabata aktivo komo spion di servisionan di inteligensia ruso. E spionnan tabata traha riba desifra mensahenan sekreto, kontraspionahe i kompilashon di informashon di chips di kompiuter pa eheristo ruso.