SER’I PARERA- Dicho ta bisa , ‘Once a Cop Always a Cops”. Apesar ku seguridat ta responsabilidat di Ministerio di Hustisia, Ministerio di Desaroyo Ekonómiko den bista di desaroyo di sektor di turismo, ta aloká fondo pa medio di Ofisina di Turismo (CTB) pa pone 17 agente di seguridat na tur playa públiko ku ta mas bishitá pa turista. Esaki ta e kaso pa 10 aña kaba.

Asina minister Ruisandro Cijntje ta indiká a base di preokupashon ku parlamentario pa MFK, Gilbert Doran a trese resientemente dilanti den un karta. Cijntje ta bisa ku ta for di 2013 a start ku e proyekto Politur pa yuda protehá di forma preventivo pero tambe pa duna kuido despues di kualke insidente ku un turista hañ’é aden durante su estadia. Segun e minister e ayudo aki di parti di Ministerio di Desaroyo Ekonómiko a yuda redusí atrako riba turista i kiebro den outonan ku turistanan ta hür.

Banda di esaki CTB pa medio di su departamento di “product development” ta duna sosten na turistanan ku bira víktima di atrako òf ladronisia manera regla un pasaporte nobo pa nan via di nan respektivo konsulado. Otro formanan di ayudo ta kambio di buelo pa nan por regresá kas mas lihé òf hustamente prolongá nan fakansi komo un tipo di kompensashon pa un eksperensia negativo ku nan a pasa aden, esta Cijntje.

Importante pa Cijntje ta ku na Kòrsou nos ta hasi nos máksimo esfuerso pa evitá ku turistanan ta bira víktima di aktonan kriminal. Pero mesun importante ta ku si unabes un turista pasa den un eksperensia negativo tòg, nan ta risibí debido atenshon i yudansa di un forma rápido. Den e kuadro aki lo sigui promové Kòrsou komo un destinashon safe i sigur, e minister ta sigui bisa.

Finalmente Cijntje ta indiká ku si no hasi nada pa pone mas tantu ku ta posibel un paro na aktonan kriminal kontra turistanan, Kòrsou ta kore e riesgo ku su sektor di turismo ta kai den otro ku tur e konsekuensianan negativo ku esaki tin pa entrada di devisa i konsekuentemente balor di nos florin.