WILLEMSTAD – Parlamentario Ramón Yung tabatin un pregunta pika pa Minister di Desaroyo Ekonómiko Ruisandro Cijntje tokante interupshonnan di koriente.

El a mustra riba sospecho ku tin ku un dje okashonnan ku a surgi interupshon di koriente, tabata trata di posibel bòikòt. P’esei e tabata ke sa dje Minister sí a investigá esaki pa por supstansiá e sospecho akí. E Minister no a duna un kontesta super kla di resultado di niun investigashon, pero a simpel bisa ku no ta ekskluí niun posibilidat.

Spesífikamente Cijntje a kontestá: “No a ekskluí niun senario i a tene kuenta ku e posibilidat enkuestion den tur investigashon.” Un kompania ku ta eksperto riba e área tékniko a hasi e investigashonnan i a yega na e konklushon ku mester ahustá e sistema di protekshon di Aqualectra.

Pero despues e Minister ta kontradesí su mes un poko riba e pregunta di Yung “sí esei tabata e kaso, kua ta e pasonan ku a òf lo bai tuma kontra esnan kulpabel p’e bòikòt”, bisando: “Manera indiká na e kontesta riba pregunta 8, for di investigashon por a konkluí ku no ta trata di bòikòt.” E Minister a haña importante pa menshoná tambe ku e pasonan tumá pa mehorá e sistema di protekshon, ta kanando konforme planifikashon. Ya a tuma algun paso pa mehorá e sistema di protekshon di Aqualectra. Segun Cijntje, ku resultado positivo. “E análisis ku a tuma lugá tabata dirigí riba e sistema di protekshon den e ret di distribushon kompletu di Aqualectra, ku e meta pa sigui ku un plan di implementashon den 2024.”