Punda— Segun un komunikado di polis, e hóben aktivista “Jason Vic” a keda detené pendiente mas investigashon. Despues di su interogashon e por a bai kas. Jason, kende ta unu dje hóbennan mas konosí na Kòrsou ta wòrdu investigá despues ku durante último kuartal di 2020 un komersiante lokal a entrega un keho.
E keho a bini despues ku e komersiante/konsehero kende ta hasi hopi obra karikativo a hasi donashon “royal” na un programa pa pakete di kuminda. “Jason Vic”, tabata e figura ku a keda enkargá ku kordinashon. E donante komersiante, kende por sierto ta di orígen den kompatibilidat atministrativo a atkerí servisionan di un akountent sertifiká pa klarifiká e atministrashon. E akountent a deskubrí froude. Konsekuentemente e donante a entrega un keho kual awe den oranan di mainta a resultá den detenshon di Jason “Vic” Scholtsz. E kaso a kousa hopi daño na e denunsiante, kende a garantisá di sigui ku e proseso apesar di e kontratempu. Ta trata di un donante ku a duna hopi den pasado i keda bastante demotiva. Semper e la yuda pa hopi proyekto i nunka a spera un sla asina aki.
Segun un komunikado di polis, kontinuando ku un investigashon relashoná ku malversashon i falsifikashon di dokumento, polis a detené un hòmber sospechoso. Djamars 9 di febrüari 2021, alrededor di 11.00’or personal di VVC Montagne a detené e hòmber sospechoso J.V.S. nasé na Kòrsou di 24 aña di edat, pa falsifikashon di dokumento i malversashon. Detenshon a tuma lugá na warda di polis Montagne. A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.