E sospechoso ku a keda detené pa e kasonan di ladronisia di vehíkulo.

 Willemstad—–Kontinuando ku un investigashon relashoná ku diferente kaso di ladronisia di outo i piesa di outo, polis a detené un hòmber sospechoso i seguidamente a tene kuater (4) entrada hudisial.

Djaweps 11 di febrüari 2021 alrededor di 15.50 or, na altura di e krusada Moontjeweg/Juan Hatoweg, Polis a detené e hòmber sospechoso V.R.H.W., di 28 aña di edat nasé na Kòrsou, relashoná ku e kasonan di ladronisia ariba menshoná.

Na momento di su detenshon e tabata den un outo prosedente di ladronisa i a konfiská esaki. Despues di e detenshon akí, e agentenan a tene kuater (4) entrada hudisial respektivamente na; Sans Souci, Mekkastraat, Kaya Galena i Kaya Cirrus.

Durante investigashon na e adrèsnan akí, polis a haña i konfiská vários piesanan di outo i tambe dos (2) outo prosedente di ladronisia. A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.