Back to Top
Vigilante banner image

Jamaloodin a súplika korte pa no huzg’e riba prueba falsifiká


January 30, 2021 • 3 minüt pa lesa

 Jorge Jamaloodin a súplika wes pa no huzg’e riba ken ta su amigunan sino huzg’e riba hechos. Pa di hopi biaha e la bisa Korte ku e no tin nada di haber ku morto di Wiels i ta spera ku e su tim di defensa por a kombense korte di esei. E ta gradisi korte na nomber di famia i tim di defensa i ta laga su destino den man di korte i di Dios

Suffisant— Jorge Jamaloodin ayera a hiba su último palabra, despues ku Ministerio Publiko i su tim di defensa a debatí durante 2 siman di tratamentu. Jamaloodin ta wòrdu akusá di a provoká asesinato di Helmin Wiels. Korte Penal den Promé Instansha konden’é pa 28 aña. E veredikto den promé instansha ta inkluso un kastigu den kaso Germaniun unda e la malversá 450 mil florin.

Na promé lugá Jorge Jamaloodin tabata kier gradisí korte pasobra mayoria di su deseonan di investigashon a keda aseptá. Jamaloodin ta spera ku korte por a konstatá ku defensa a uza e informashon pa por a krea un bista total di e situashon. E la referí na e tratamentunan preliminar for di aña pasá unda defensa a súplika korte di apelashon pa permití kumpli ku nan petishon riba un seri di informashon i deklarashon di testigunan. Tambe e la súplika korte pa lesa i studia su kaso profundo i pa por tin bista riba tur e aspektonan. Segun e eks minister di finansas e lo sali ayera ku e konvikshon  ku korte lo hasi netamente esei.  Pero esei no ta nifiká ku mi e ta sali ku un kurason trankil. No pasobra e mester warda riba su veredikto, pasobra tambe durante e oudiensia  di  ekaso su prekupashon a oumentá. Segun Jamaloodin den korte di Promé Instansha,  e la puntra su mes kiko mishi su persona dilanti un korte di tres wes pa asesinato di Wiels.

Pero durante tratamentu di e kaso aki, miedu a drenta su kurpa. E la bisa ayera ku segun e skuchando deklarashon di testigunan e la kuminsá puntra ta kon e la bin e por a hañ’é den un situashon akusá pa morto di Wiels. Helmin Wiels no a strob’é di hasi nada, segun Jamaloodin kende tabata bisti na oraño ku un suèter largu shinishi pa ta tapa friu.  Pa tal motibu e no por ta mira un motibu dikon lo mester hasi Wiels algu. Durante su funshon komo minister, Wiels tabatin krítika riba su maneho, pero esei tabata su sistema di hasi polítika, Jamaloodin a duna di konosé ayera durante su último palabra. Den pasado, Wiels a yega defendé su persona mes huntu ku Robbie su ruman. Wiels a hasta a krítika Ministerio Publiko durante redada ku nan a hasi kontra di Dos Santos i su persona. Jamaloodin a splika korte ku Wiels tabata bai su kas i nan tabata amigu den bario. Wiels tabata amigu di su rumannan miéntras e mes tabata amigu di Aubert Wiels, kende por sierto tabata den korte sintá hinter siman.

E eks minister a sigui bisa ku den su bida el a traha hopi duru. E tabata hasi hopi negoshi pero di otro banda e tabata disfrutá di bida. E ta bai kasino i ta disfrutá bida ku su famia i amigunan, sali bebe ets ets. . Pero ainda e no por komprondé dikon e ta den e posishon ku e ta awor aki, esta dilanti tres wes akusá den morto di Wiels. Jamaloodin a puntra su mes si ta pa motibu di tabata  amigu di Fonseca a akus’é di e morto. Jamaloodin a súplika korte pa tene kuenta ku Kòrsou ta un komunidat chikitu i no ta pasobra e ta amigu di un persona ta nifiká ku e ta envolví den nan kosnan. E la súplika e tribunal pa no huzg’e abase di esnan ku e konosé sino abase di e hechonan. “Mi no ta un angel”, e la duna di konosé ayera na e tribunal di 3 wes, pero bo mester karga bo responsabilidat anto esei semper e la siña su yunan.

Login