Willemstad,– Javier Silvania proksimo minister di finansa a splika ayera durante rueda di prensa ku gabinete Pisas tin alternativanan.

“Manera nos a bin ta indiká  den nos akuerdo di gobernashon, nos lo sòru pa e sirkuito gris i pretu tambe kuminsá kontribuí nan granito na nos komunidat. P’esei nos lo hasi sierto ahuste na entre otro e lei di omzetbelasting. Ku un sistema mas simpel pa kontrolá i ku sirkuito gris i pretu kontribuyendo na nos komunidat, lo por suavisá otro aspekto nan di impuesto pa stimulá ekonomia i empleo”, pues Silvanie.

Overdrachtsdossier

E ta bisa ku pa gabinete Pisas por kuminsá ku su trabounan, ta importante pa nos tin un bista kla di tantu kasonan andando di Ministerio di Finansa, komo den e presupuesto. Komo ku nos ta den un tempu di krísis, nos mester utilisá kada un dia pa traha pa bienestar di pueblo di Kòrsou. Pa e motibu aki nos mester por disponé di informashonnan nesesario pa nos por traha.

Usualmente na momento ku gobièrnu nobo sinta, nan ta haña disposishon di informashonnan di pais. Den e kaso aki, nos ta den un situashon di krísis. P’esei ta importante ku for di awor nos por haña akseso na informashon importante pa nos por kuminsá pensa riba solushonnan pa ku e défisit den nos presupuesto.

E futuro minister ta bisa ku gabinete Pisas ta urgí minister Kenneth Gijsbertha pa proveé e informashon aki di moda ku nan por sigui ku nan trabounan di pueblo i pa pueblo.