WILLEMSTAD—E tenista Yu di Kòrsou, Jean Julien Rojer, kende ta den akshon den kategoria dòbel di e torneo internashonal di tènis, ‘Rothesay International Eastbourne Tournament’, ta parti di kuartfinal di e torneo.

Esaki unda ku e ta den akshon huntu ku su duo, e tenista britániko, Lloyd Glasspool.

Ta trata aki di torneo ku a inisiá djasabra último dia 22 yüni i ta programá pa konosé su final, djasabra benidero, dia 29 yüni 2024.

Ayera nan tabata den akshon, debutando den e edishon pa aña 2024 di e torneo. Tabata partido bálido pa e buèlta di 16, ora nan a topa ku e duo, formá pa tenistanan Hugo Nys di Fransia i Jan Zielinski di Polonia. Rojer i Glasspool a logra triunfo ku skor di 7(7)-6(3), 4-6 i 17-15.

Ku e triunfo aki, nan a pasa pa e buèlta di kuartfinal, unda ku nan kontrinkantenan ta bira konosí awe. Esaki lo bini for di e wega entre e duo formá pa tenistanan Marcelo Arevalo di El Salvador, kende a hunga den duo ku Jean Julien den pasado, kende tin Mate Pavic di Kroasia komo su duo, unda nan lo enfrentá Francisco Ceriundolo i Tomas Etcheverry, ámbos for di Argentina.