Segun Presidente di CBF (febeko, Jedrek Magdalena, federashon ta risibí un karta di gobièrnu indikando ku no tin fondo pa finansiá e biahe i ku esaki tabata un baño di awa friu, selekshon tin basta gastu hasi kaba pa preparashon

Willemstad,– Segun informashonnan ku nos ta disponé di dje, ku chèns ta grandi ku nos selekshon máksimo di beisbòl lo no partisipá mas na Caribbean Cup ku lo tuma lugá e siman aki na Puerto Rico. E selekshon lo mester biaha djaweps awor 28 di sèptèmber pa Puerto Rico

Esaki despues ku 1 siman promé ku e biahe mester tuma lugá, federashon ta risibí un karta di gobièrnu indikando ku no tin fondo pa finansiá esaki.

Segun nos fuentenan den gobièrnu, Febeko a entrega su petishon lat i lo mester a hasi adaptashon i usa sèn nan destiná pa deporte pa otro proyekto.

Sigur un sla duru pa Federashon di beisbòl mirando e importansia di e torneo aki i tambe butando na peliger partisipashon di Kòrsou den torneo di U23 ku ta programa pa novèmber 2023.

Segun Presidente di CBF (febeko) esaki tabata un baño di awa friu, selekshon tin basta gastu hasi kaba pa preparashon i federashon mes a “schietvoor” e ticket nan ku si no partisipá lo ta sèn pèrdí. Tambe e lo ta un sla duru pa nos status internashonal ku a bin ta krese último aña na i lo afektá nos posishon den ranking mundial.

E presidente di federashon ta sigui bisa ku ta kuadra ku Febeko na vários okashon a entrega subsidie lat. Na lugá di 12 siman adelantá ta entreg’é entre 10-8 siman adelantá”

Esaki debí ku pa torneo nan internashonal semper nos ta haña e gastunan finansiero di e torneo 8 siman promé ku e torneo di parti e federashon internashonal ku ta organis’é.

E ta sigui splika ku sin e gastunan finansiero ku federashonnan internashonal mester duna febeko ta imposibel traha un presupuesto ku ta kuadra ku e realidat.

“Den pasado nos a yega di hasié, pero kada torneo ta varia asina tantu ku ta kasi imposibel hasi un kalkulo i bo ta kore rísiko ku si bo kalkulashon ta ménos, lobo tin un diferensia grandi ku gobièrnu lo no yudabo kubri paso ya nan a aprobá bo petishon”, asina Jedrek ta splika.

Di otro banda si bo risibí sèn di mas bo no ta  praktikando bo trabou komo dirigente bon i ta hinka gobièrnu den gastu innesesario.

Pero señor Magdalena a splika Vigilante ku e tin konfiansa ku Gobièrnu di un forma òf otro lo kumpli tòg i mustra ku nan kurason ta bati pa deporte di bèrdat