Un kantidat grandi di klientenan di JetAir a akudí na Snipweg pa wak kiko ta bai sosodé ku nan sèn.
Snipweg,– Un kantidat grandi di reklamo a drenta redakshon di Vigilante, despues ku korte sivil a dikta bankarota pa e kompanianan di aviashon JetAir Caribbean B.V. i United Caribbean Airlines B.V., kual ta operá bou di e nòmber JetAir.
Pa algun tempu kaba, por a nota kon e dos avion nan F70 kada bes tabata tin problemanan tékniko kual sea a sòru ku e buelonan tabata haña retraso òf e buelonan tabata keda kanselá por kompleto. Segun informashon, e kompania a risibí su pèrmitnan pa bula nèt promé ku Covid-19 i den otro palabra e operashon nan di e kompania a kuminsá demasiado lento. Esaki a krea un debe ku nunka mas no por a keda aliviá. Alabes, JetAir no tabata tin sufisiente fondo pa por hasi mantenshon riba tur dos avion F70, kual a finalisá ku 1 avion a keda desmantelá por kompletu.
E piesanan di e avion desmantelá ta keda usá pa e avion ku a keda bula, pero riba término kòrtiku a resultá ku e avion ku a sigui bula mester kambia su motor. Kual ta un invershon ku JetAir no por finansiá. Mas aleu debí ku den e promé 4 luna den 2024 JetAir a akumulá un debe di 2 mion florin i ku e entrada nan aktual no por paga e debe, e kompania a opta pa pidi korte pa deklará nan fayit. 1 dia despues, riba 18 di yüni, korte a deklará ku e ta honra e petishon di fayit i ku curator lo kana e ruta pa likidá e kompania di aviashon.
Despues ku klientenan a risibí e informashon ku JetAir a bai bankarota, por a nota ku ayera for di den oranan di mainta un kantidat grandi di persona a akudí na e ofisina prinsipal situá na Snipweg. Ta asina ku un kliente a reklamá ku ta algun ora promé ku e kompania a wòrdu deklará fayit el a kumpra un reservashon pa bula. Segun e kliente, riba djaluna, 4 or di atardi el a kumpra un ticket na e ofisina prinsipal di JetAir. I na momentu ku el a puntra e kahera tokante e problemanan aktual di e kompania, e kahera a splika ku e kompania ta bula normal. Un otro kliente a indiká ku nan tin 6 mil florin pagá pa bula ku JetAir anto e echo ku e kompania a bai fayit ta un sla duru pa e kliente aki.
Pa loke ta trata dunamentu di sèn bèk, pronto riba e wèpsait di JetAir e kompania lo bai publiká vários informashon tokante e aspekto aki.