WILLEMSTAD – Korte di Promé Instansia resientemente a dikta sentensia den un kaso entre e kompania Jomar Foods B.V. i Circle Multiple Services (CMS), tokante un demanda di JF tokante plakanan no pagá ku CMS tabata kobra na nòmber di Jomar Foods. E sentensia ta ku CMS mester paga e plaka na Jomar Foods, despues di deskontá gastunan. Ta trata di kasi 11 mil florin.

E kaso a kuminsá ku un petishon entregá pa Jomar Foods dia 10 di febrüari aña pasá. Despues dje tratamentu riba 23 di ougùstùs, e partidonan a haña e oportunidat pa yega na un solushon amigabel. Ora ku esaki no a logra, Korte a sigui ku e proseso hudisial. Jomar Foods a entregá mas prueba, miéntras ku CMS a pidi na vários okashon pa posponé e kaso, loke a resultá den un prosedimentu skirbí. Eventualmente Jomar Foods a redusí su demanda i a hala un otro demanda kontra un segundo partido aden bèk.

Circle Multiple Services ta un negoshi chikí (“eenmanszaak”) ku dos persona na kabes ku tin e aporado pa tuma desishonnan na nòmber dje kompania. CMS a firma un akuerdo ku Jomar Foods den 2021. Segun e akuerdo akí, CMS lo kobra e klientanan di Jomar Foods plaka di debe na nòmber di Jomar Foods i lo deskontá su propio gastunan, pa despues transferí sobrá pa Jomar Foods. Sinembargo, Jomar Foods no a risibí e plakanan kobrá akí.

CMS tabatin un debe tambe di 16.215,10 dòler na Grupo Empresarial Lanes (GEL), un otro kliente ku CMS tabata enkarga pa kobra sèn p’e. A palabrá ku lo usa e plaka ku CMS kobra na nòmber di Jomar Foods, pa paga e debe na GEL. Esaki no a sosodé, i Jomar Foods tampoko no a risibí ningun pago di CMS.

Inisialmente, Jomar Foods a eksigí un suma di 80.539,15 florin for di CMS, pero despues a redusí esaki te na 10.767,23 florin, despues di deskontá e debe na GEL i e gastunan di provishon. Jomar Foods a alegá ku CMS no a kumpli ku su obigashon manera stipulá den e akuerdo (“volmachtsovereenkomst”) i p’esei a hasi e demanda tambe pa deklará lega ku e kontrakt aki ta kibrá pafó di Korte entrante 28 di sèptèmber 2022.

E representantenan di CMS a para ariba ku a kobra solamente 10 mil florin i ku a hasi esfuero pa kobra e sobrá debenan, pero sin resultado deseá. Un dje dos representantenan a ninga ku tabatin palabrashon pa paga debe na GEL sin dokumentonan firmá pa Jomar Foods. El a añadí ku si Jomar Foods mester risibí plaka, antó mester sera un areglo di pago.

Hues a studia e kaso i a establesé ku un dje representantenan a atmití durante tratamentu dje kaso den sala di Korte di a kobra mas ku 10 mil florin pa Jomar Foods. For di e dokumentonan a sali na klas ku CMS a kobra un total di 42.682,61 florin. Despues di deskontá e debe na GEL i e gastunan di provishon, a sobra 10.767,23 florin ku Jomar Foods mester risibí. Hues a asumí ku e kálkulo akí ta korekto pasó CMS no a duna un argumento kontra di esaki ku prueba. P’esei Korte a aprobá e demanda di pago, pero e petishon pa deklará e kontrakt kibrá sí e hues a rechasá. E hues a husga ku no por papia akí di niun fayo riba 28 di sèptèmber 2022, pasó CMS no a risibí niun notifikashon di esaki anteriormente. Komo e partido pèrdèdó, un dje representantenan di CMS ta kondená na paga e gastunan hurídiko dje kaso sivil akí tambe ku Jomar Foods mester a hasi, balorá na 3.726,64 florin. Hues a disidí ku por ehekutá e sentensia akí inmediatamente.