Back to Top
Vigilante banner image

Joran van der Sloot kondená na 18 aña di prizòn pa kontrabanda di droga


January 11, 2023 • 2 minüt pa lesa

Joran van der Sloot tabata sòru pa loternan grandi di kokaïna drenta den e prizòn Juliaca na Perú kaminda e ta será.

Perú, — Segun informashon, e detenido Arubiano Joran van der Sloot di 35 aña, a keda kondená na 18 aña mas di prizon djaluna último pa kontrabanda di droga den e prizon ku e ta será na Perú. E korant “De Telegraaf” a informá esaki despues di a papia ku su abogado i a risibí konfirmashon. Van der Sloot ya ta será den prizon pa asesinato di e studiante Peruana Stephany Flores.

Van der Sloot mester a bai dilanti korte, pa motibu ku e tabata sòru pa lotenan grandi di kokaïna drenta di kontrabanda den e prizon di Juliaca. E droganan generalmente tabata keda skondí den wòrtelnan di mata ku ta produsí suku. Esaki tabata keda tresé via di un famia di un kompañero di prizòn di Van der Sloot.

Segun korte, Van der Sloot tabatin un ròl sumamente importante den e kontrabanda di droga. No solamente Van der Sloot tabata bende e droga ku su kompañeronan den prizon pero e tabata manda esaki tambe den paketenan ku e tabata pòst na adrèsnan den eksterior. Asina e tabata manehá un “negoshi” lukrativo te ora personalnan di seguridat a deskubrí e kontrabanda di droga.

Van de Sloot ya ta den prizon pa asesinato di e dama Stephany Flores. Na 2022, el a keda kondená na 28 aña di prizon na Peru. Tambe e ta keda sospechá di ta involukrá den e desaparishon di e dama Merikano Natalee Holloway na 2005. Te ku dia di awe, no sa nada di e dama Merikano aki i nunka a haña su kurpa.

E sentensia di 18 aña di prizon pa kontrabanda di droga ta keda sumá riba e 28 aña ku ya Van der Sloot tabata sinta. Den praktika, e mester keda será 7 aña mas riba e 28 aña pa motibu ku lei na Peru no ta pèrmití un detenido sinta un kastigu mas largu ku 35 aña. Pues, di e forma aki, Van de Sloot ta butá pa rekobrá su libertat na aña 2045.

Login