Otrobanda—CMC a graba video pa asina enfermero/ a nan por a konta kon nan ta eksperensiando e situashon di Covid-19 na boka di trabou.

Sr. Jourmaine Juliao ta un di e enfermeronan ku ta traha den departamentu di kuido intensivo na CMC. Jourmaine a splika ku na momentu ku bo mester di yudansa avansá ku bo rosea ta indikashon ku bo mester drenta kuido intensivo. E la splika ku lokual e la eksperensia hopi ta ku e pashèntnan ta drenta i nan tin hopi problema respiratorio. Esei ta na momentu ku un persona no por hala rosea bon i ta hopi kansa, n’e momentu ei e enfermero/ a nan mester pone e pashènt na mashin di hala rosea i tin biaha asta hinka tubu den nan boka pa nan por haña yudansa pa hala rosea. Lokual nan ku ta traha den departamentu di kuido intensivo ta ripara ta ku e hendenan ta hopi kansá i tin ora asta ta bira depresivo.

E pashènt ta bira depresivo na momentu ku e ta den un kamber su so, paso e no por tin kontakto ku niun otro persona i e ta haña esaki poko ferfelu. E la splika ku nan edat ta varia hopi, e ta ripara ku hendenan mas grandi tin mas molèster di e situashon i tin asta a fayesé. Pero tin pashèntnan yòn tambe, dus no ta e hende nan di edat grandi so pero tin yòn tambe ku ta wòrdu afektá pa motibu di e vírùs. Na momentu ku e pashènt yega kuido intensivo ta opserv’é, pega monitor nan pa por opserv’é mas mihó, duna oksígeno i pega mashin nan di rosea.

Si e pashènt bai mas patras di lokual e ta tabata ta hinka e tubu den su boka pega na e mashin di rosea. E tubu ta pasa den boka di e pashènt i bai te na su pulmon pa asina e mashin hala rosea pe, enbes di su mes hala rosea. Debí ku e mes no tin e kapasidat pa hala rosea, e mashin ta yud’é ku esaki. Nan mester opservá e pashènt nan tur dia, duna remedi nan ku ta yuda pa preshon. 

E parti di mas difísil pa e pashènt ku ta den kuido intensivo ta ku e no mag di risibí bishita di niun famia òf konosí. Esaki ta algu hopi ferfelu tantu pa e famia i e pashènt, pero esaki ta pa prekoushon pa ku e situashon di Covid- 19. Jourmaine a splika ku tin un grupo ku ta komprondé esaki pero e otro grupo no por kaba di aseptá esaki.