WILLEMSTAD,—-Pa straño ku esaki por zona, representantenan di karnaval ku ta Fundashon J.A.G. i A.G.K.K. no a haña invitashon pa por partisipá den e Asamblea Nashonal ku ta tumando luga den “Renaissance Curaçao Resort & Casino.

Pa loke ta trata e sektor di Karnaval Nashonal, ta keda representá pa dos persona i esakinan ta señor Hubert “Juni” Aniceta di Fundashon J.A.G. i señor Henny Reinilia di A.G.K.K.. Ta tratadi e dos motornan grandi tras di e evento nashonal mas grandi dje isla. T’asina ku ayera Vigilante Farándula a drenta den kontakto ku ámbos persona, pa asina tende kon bin ningun di nan dos no a haña invitashon, pa por a partisipá den e Asamblea di djaluna tras di lomba. E promé persona ku Vigilante Farándula a papia kuné ta Hubert “Juni” Aniceta, i el a bisa lo siguiente. “Ami no a haña nada di invitashon pa mi por ta presente den e Asamblea di djaluna último, esaki sigur ta un falta di rèspèt ku esunnan ku a organisá e Asamblea no a manda invitashon pa un organisashon ku a organisá karnaval tres aña tras di otro. Den otro palabra mi por bisabu ku esaki ta un falta di rèspèt tantu na mi persona i tambe na e organisashon Fundashon J.A.G. Tambe mi a komprendé ku Henny Reinilia di A.G.K.K. tampoko no a haña invitashon pa por ta presente den e Asamblea. Pero mi ta spera ku gobièrnu nobo ku a huramentá ayera por trese un kambio den loke nan ku tin ta pasando”.

Mas despues Vigilante Farándula a drenta den kontakto ku Henny Reinilia di A.G.K.K., mester bisa ku Henny tabata hopi kòrtiku i e la bisa ku, “Loke ku a pasa ta un falta di rèspèt kompletu, si bo a organisá un Asamblea bo mester ta na altura pa invitá A.G.K.K. i Fundashon J.A.G., mirando ku e dos organisashon nan aki a traha tres aña, pa asina duna e pueblo i mundu kompleto un Karnaval riba in nivel haltu. E tipo di kosnan aki mester stòp di pasa na Kòrsou, esaki sigur no ta e manera pa organisá un Asamblea”.