Grote Berg na unda a logra di blòkia e vehíkulo ku e dos sospechoso nan aden.
Willemstad—– Dos tipo ku a kaba di hòrta pertinenshanan ku ta pertenesé na turista a keda arestá ora nan tabata riba kaminda pa kas.
Tabata djaluna 20 di mart 2023, alrededor di 12.19’or di mèrdia, sentral di Polis a risibí un notifikashon di un kaso di ladronisia ku a tuma lugá na Watamula. Mesora a dirigí un unidat na e sitio. For di e investigashon preliminar a sali na kla ku dos sospechoso den un vehíkulo kolo blanku di e marka Kia Picanto ku glasnan pretu di plak, mester a kibra den un vehíkulo di un famia turista i hòrta pertenensia for di e vehíkulo. E tiponan aki mester a destruí e glas patras di e vehíkulo pa asina por a habri porta i kue tas bai kuné. Polisnan ku a haña marka i kolo di e vehíkulo mesora a kuminsá ku un búskeda riba e kamindanan ku ta kondusí pa Banda Bou. Despues di un búskeda polis a logra señalá e vehíkulo ku e sospechosonan na altura di Groteberg. Huntu ku mas patruya a logra di blòkia e vehíkulo i a bin topa ku dos okupante den esaki. Na e sitio Polis a detené e sospechosonan i a konfiská e pertinensianan prosedente di ladronisia. Den e vehíkulonan a bin topa ku euro kual tabata kuadra ku plaka ku a ser hòrta den e vehíkulonan di e turistanan. Mesora e dos sospechosonan a keda arestá i ta trata di: · C.J.M., nasé na Kòrsou di 22 aña di edat. · U.F.M., nasé na Kòrsou di 38 aña di edat. E vehíkulo tambe a keda konfiská i a bai warda ku esaki tambe. A presentá e sospechosonan dilanti un fiskal ouksiliar ku despues di interogashon a ordená nan enkarselamentu pendiente di mas investigashon.