Back to Top
Vigilante banner image

Kabinete Pisas lo aprobá i implementá Areglo di Disputa


May 4, 2021 • 2 minüt pa lesa

Deliberá: Chester Peterson den kombersashon ku kandidato minister di hustisia Eduard Braam. Peterson a yega di traha diferente konseho riba e Areglo di Disputa.

Punda—Un otro punto den Relashonnan di Reino ta finalisashon di e asina yamá Areglo di Disputa. Segun e Akuerdo di Gobernashon entre MFK i PNP, nan lo aprobá i implementá e Areglo di Disputa manera ya akordá pa e 4 Parlamentonan den Reino.

E problemátika di Areglo di Disputa ta unu eksistente for di 2006 pa 2007, na momento e paisnan den Reino a kuminsá nan preparashon pa 10-10-10. Durante e negosiashonnan, na Utrecht sèptèmber 2007, Hirsh Ballin a introdusí e konsepto di “Leinan di Konsenso”. Via di implementashon di e leinan aki, mester a regulá e kambionan pa 10-10-10. Un di e diskushonnan for di 2007, tabata pa introdusí un areglo di disputa, na momento e kambionan den Reino Ulandes okashoná konflikto. E paisnan chikitu no tabata kier a bai via di e Hunta di Minister di Reino mas, debí ku esaki tabata un institushon ulandes unilateral. Asina e negosiashonnan a yega te na 2010, sin nunka a pone un Areglo di Disputa, kual entretantu mester a tuma lugá via di un modifikashon di Art 12 den Statüt. Sosionan den Reino a logra laga Ulanda kombensé nan pa firma na 10-10-10 i primintí ku lo modifiká Statüt. Esaki nunka a sosodé.

Un Areglo di Disputa ta importante pa nos demokrasia, pasobra e ta eliminá e poder unilateral di Ulanda. Ademas e ta implementá den Statüt, lokual Ulanda no por desviá for di dje. E intenshon di e Areglo di Disputa tabata pa kita poder for di e Hunta di Minister di Reino, unda Kòrsou i demas sosionan den Karibe no tin niun entrada ni tampoko poder ehekutivo. Ta lógiko ku Ulanda, nunka tabatin intenshon pa implementá un Areglo di tal índole unda nan ta pèrdè kòntròl riba e islanan den Karibe, prinsipalmente Kòrsou, Aruba, St. Maarten.

Login