Tarea duru: kandidato minister di Finansas, Javier Silvania tin e tarea pa baha e debe nashonal pa kabes na Kòrsou.

Punda—E fiansanan di Hulanda durante 2020 kual tabata 670 mion florin a oumentá e debe total di Kòrsou. Esaki a nifiká ku Kòrsou su debe interno/eksterno a largo plaso, kompará ku 2019 a oumentá ku 700 mion florin. Na 2019, segun e reportahe finansiero di gobièrnu Kòrsou a sera ku un debe a largo plaso di 2.3 miar florin. Pa desèmber 2020, esaki a bira 3 miar florin. Esaki tabata debenan na Pais Hulanda. I segun un rueda di prensa di banko sentral mester pone aserka debenan na institutonan lokal ku por yega 600 mion adishonal. Ainda mester pone aserka debe na demas kréditornan.

Pa lokual ta trata e debe na fiansa di 3 miar florin serka Hulanda, ta inkluso kasi 1.6 miar florin ku restrukturashon di 10-10-10 a trese kuné. Na 2020, Kòrsou mester a paga 82 mion florin for di e 1.6 miar florin pero Hulanda a kambia e tèrmino i manda e kanselashon te na 2035. Sobrá komponentenan di Kòrsou su debe ta emishon di debe kual mayoria ta Hulanda mes a kumpra. Finalmente a bini aserka 700 mion di sosten likides na 2020. kual tambe a keda apuntá komo un fiansa den forma di bono.

E diskushon durante 2021 ta bira, kon ta bai pega bek i kiko esaki ta kosta kada siudadano. Cft a menshoná e suma di 100 mion florin pa inisiá un skedjel di repago pa un fiansa ku Kòrsou a sera na 10-10-10. Segun e Reportahe Finansiero di 2020, Kòrsou a paga 100 mion florin. Ta asina ku na 10-10-10 despues di restrukturashon di debe nashonal, Hulanda a bai na akuerdo pa transferí parti dje debe, un suma di 1.6 miar florin na debe di obligashon kual a kuminsá kaduká na òktober 2020. Esaki a enserá ku Kòrsou mester kuminsá paga. Pa 2020 e suma aki tabata 100 mion florin i ta apuntá riba e reportahe di Cft. Pero den un karta di Raymond Knops, e sekretario di estado ulandes ta menshoná un transformashon di 82 mion na obligashon den un periodo di 15 aña. Knops no a papia di 100 mion florin. E 15 aña di Knops ta nifiká ku finalmente e parti aki lo kanselá na 2035, kual pa kasualidat ta mesun fecha menshoná den COHO ku Kòrsou su debe nashonal mester baha. Pero awor ku COHO no ta bálido mas pa e gobièrnu aktual, no ta konosí kiko Hulanda ta bai hasi ku e repago.

Un karta ku sekretario di estado pa asuntunan hulandes den reino, Raymond Knops a manda pa parlamento di Hulanda, ta indiká ku un obligashon finansiero pa Kòrsou kuminsá paga 82 mion florin ta bai wòrdu restrukturá. Knops a papia di transformá e pago di 82 mion florin den un fiansa di 15 aña sin interes. Pa lokual ta trata 82 mion menshoná den e karta di Knops, e repago aki, ta un solushon temporal, debí ku e suma di debe nashonal ku Kòrsou tin pa 2021, ta entre 3.6 miar florin pa 4 miar florin. Ainda no tin un klaridat kon ta bai restrukturá esaki. Tantu Banko Sentral, Jose Jardim komo minister Gijsbertha a menshoná pa Hulanda asumí su posishon den Reino i opsekiá parti di e makro fiansa. Segun Cft,  Kòrsou na 2020 mester paga kasi 158 mion na obligashon di bono i interes riba bono.  Kòrsou debe Hulanda, pa lokual ta trata saneamentu di e debe na 2010 ainda un suma di 1.6 miar florin. (Na sifras: Nafl. 1.600.000.000.) E debe total na Hulanda segun Raymond Knops ta 2.4 miar florin (Nafl. 2.400.000.000., eksl Fondo di Sosten na Nafl. 670.000.00.) E  670 mion florin ta inkluso e último tranche di 286 mion florin na novèmber 2020.

Pa e siudadano di Kòrsou, esaki ta nifiká un debe nashonal di Nafl. 25.641,= florin pa kabes (dependé definishon di e debe interno e suma por ta poko mas abou). . Esaki ta lokual ekonomistanan ta definí komo debe nashonal total pa capita. Por interpretá e sifra aki den tur forma teorétiko komo práktika, pero  e mihó splikashon ta simpel: kada yu di Kòrsou ku nase awe i ta biba riba nos pais tin un debe indirekt kologando riba su kabes di 25 mil florin. Sea via di COHO òf IMF, e úniko manera pa kuminsá paga a korto plaso ta oumento den impuesto.