Minister mr. Hato a splika ayera durante rueda di prensa ku polis lo aktua fleksibel kaminda por pero firme i severo kaminda tin mester.

Willemstad: Ayera durante rueda di prensa di gobièrnu enkonekshon ku marchanan di Karnaval benidero, nos Minister di Hustisia sr. Shalten Hato a trese dilanti ku outoridatnan ta bai aktua ku man duru den e sistema di sero toleransha kual a keda introdusí na 2015. Esaki ta parti di e kampaña “AKTUA ROBES, SINTI’É UN BES”.

E Minister a bisa ku Karnaval tei bèk kual ta un tremendo notisia pa nos tur ku gusta festehá i disfrutá di bida. Despues di dos aña ku nos komo pueblo no por a selebrá e fiesta grandi aki, e fiesta nashonal kultural di mas grandi, den 2023, porfin, tin karnaval. 

Primeramente e Minister a felisitá e organisashon di karnaval 51 i tambe minister sr. van Heydoorn pa e bon trabou desplegá te ku awor. Nos tabatin un apertura tur afó ku dos tumba ganadó kual ta e tumba hubenil “Zeekat yangando” i e tumba grandi kual ta “Kaminda tin huma tin kandela”. 

“SENDE TA KONSIENTE” ta dirigí riba hóbennan

Den kuadro di karnaval, e proyekto multi disiplinario, “SENDÉ  TA KONSIENTE”  dirigí riba konsientisashon pa hóbennan, ya ta bezig na skolnan básiko i tambe sekundario ku charlanan i tambe ku sekshon di informashon. Temanan manera “Safe Sex”, uso di alkohòl i droga ta keda papiá ku e hóbennan, pa eduká nan di tal forma ku nan por gosa sanamente di nos karnaval. 

Komo parti di e minister su plan di maneho strategiko pa hustisia kaminda e hende ta sentral, ta importante pa tantu esnan mas yòn komo esnan di avansá ta protehá i tin sufisiente informashon pa sa kon pa ta “Safe” durante e periodo festivo aki. 

“AKTUA ROBES, SINTIÉ UN BES”

E minister a bisa ku komo minister di Hustisia, obviamente, e tin e tarea pa perkurá ku òrden públiko ta keda mantené na tur momento durante karnaval. E aña aki, kuerpo polisial konhuntamente ku Ministerio Públiko lo tin nan kampaña di “AKTUA ROBES, SINTIÉ UN BES”, kual a ser introdusí na aña 2015. Ayera sr. Elton Sambo kual ta parti di e tim di maneho di kuerpo polisial tambe tabata presente. 

Polisnan no lo duda pa  detené personanan durante ruta di Karnaval

Aktua robes, sintié un bes, ta enserá un periodo di “Sero Toleransha” kaminda tin instrukshon duná na polis pa nan atendé ku man fuerte kontra personanan ku no ta tene nan mes na regla i leinan vigente. Esaki ta enserá ku polis no lo duda pa detené personanan ku por èhempel tin kantidatnan minimo di droga òf arma den nan posishon òf ku ta ninga di sigui òrdu di polis. 

Listramentu preventivo

Banda di esaki lo tin listramentu preventivo riba e ruta di karnaval i e vianan ku ta kondusí na karnaval. E minister a bisa ku e ke enfatisá ku por listra tur persona ku ta kanando, ku ta den outo, riba skuter, bròmer pa ku arma i droga. Polis lo aktua fleksibel kaminda por pero firme i severo kaminda tin mester.

Tur hende riba 12 aña mester tin identidat bálido

Ta importante tambe, e Minister a enfatisá ku tur persona for di 12 aña bai ariba, riba vianan públiko mester ta den posishon di un papel òf prueba di identidat bálido. Esaki ta nesesario pa kontrolá i perkurá pa mantenshon di òrden públiko. Polis ta bai kontrolá ábase di e lei di identifikashon, e asina yamá “landsverordering”, 20 mei 2022, esta e lei ku ta regardá  “indentificatie plicht”.  Tur esaki, segun e minister ta pa nos por disfrutá di un dushi karnaval i regresá kas bèk sano i salvo.