Back to Top
Vigilante banner image

Kanser i su impakto: PWF ta hasi e diferensia


February 4, 2023 • 2 minüt pa lesa

WILLEMSTAD,– Dia mundial di kanser ta awe  djasabra 4 di febrüari i e tema e aña aki ta: E impakto di kanser. 

Riba e dia aki, rònt mundu ta pone atenshon na e lucha kontra di kanser i ta organisá diferente aktividat pa krea konsientisashon tokante e tópiko importante aki. Prinses Wilhelmina Fonds ta hunga un ròl krusial den esaki na nos isla. For di nan establesimentu na 1949, PWF ta determiná na bai e lucha kontra di kanser na Kòrsou. Kanser ta bòltu bo mundu ariba bou. E impakto di kanser riba e bida di e pashènt, i sigur tambe riba e hendenan rondó di dje ta enorme.

E tópiko aki ta kana den akuerdo ku e aktividat nukleo di PWF, brinda guia mental i emoshonal na pashèntnan di kanser.  Un tim profeshonal ta para kla pa sostené tantu e kliente komo nan famia durante e periodo turbulento aki.

E departamentu di terapia i rekreashon ta organisá diariamente aktividatnan na e sentro di PWF na Scharlooweg. Banda di esaki tambe nan ta organisá regularmente workshopnan paso di e sentro, komo pa komplementá e guia i sosten ku un kliente ta risibí, 

Prinses Wilhelmina Fonds (PWF) ta kere ku trabou di kooperashon ta e yabi den e lucha kontra di kanser. P’esei e fundashon ta traha huntu ku hopi otro manera: CMC, Fundashon Prevenshon, Wit Gele Kruis, Thuiszorg Bandabou, Lab de Med, JCI Clic, dòkter di kas, etc.

E organisashon ta dependé finansieramente di donashon i aparte di guia profeshonal, e aporte di hopi boluntario bon instruí ta indispensabel. Huntu PWF ta hasi diferensia den bida di un persona ku tin kanser. P’esei nan ta yama e komunidat di Kòrsou pa uni ku PWF den e lucha pa kombatí kanser. Sea ku ta via di un kontribushon finansiero, trahando komo boluntario òf kompartí konosementu i eksperensha, tur kontribushon ta balioso.

Laga nos traha huntu pa un futuro kaminda kanser tin menos impakto riba nos komunidat.

Login