DEN HAAG—Un kantidat rekòrt di hulandesnan a keda kontagiá ku dengue den último 6 luna, ta trata di 112 hende ku a keda kontagiá den eksterior.

Den 2023 un kantidat di 113 persona a haña dengue segun sentro di alarma Eurocross. Ta remarkabel ku kasi mesun tantu hende ta kontagiá ku aña pasa. Ta pronostiká mas di 200 kontagio e aña aki. Dengue ta un vírùs ku bo por haña di un pika di un sangura asiatiko. E sanguranan aki ta okashoná tambe chikungunya i zika. Un hende ku haña dengue promé biaha tin simptomanan di keintura, dolor di wesu, dolor di kabes i biramentu kabes. Si den kaso di otro malesanan e efekto ta menos den un di dos kontagio, ku dengue ta net kontrali. E di dos of tres kontagio ta mas peligroso. Un persona kontagiá por haña sangramentu, kai den shòk, su organonan manera selebre, kurason i igra por daña i den kaso mas serio morto. Tin 4 sorto di dengue i pa ningun di nan no tin tratamentu. Si un hende keda kontagia e mester bebe paracetamol i bebe sufisiente awa. Segun ekspertonan antes dengue tabata prinsipalmente den paisnan tropikal den paisnan manera Thailand, Indonesia i Kòrsou. Pero ta mirando mas kontagio mas serka di kas, rondó di Mediteraneo. E outoridat di seguridat i alimento a start ku kombatimentu di e sangura asiatiko na varios sitio. Por bakuna kontra dengue. Eurocross i universidat Leiden ta start un investigashon sientifiko pa kompronde e malesa mas mihó.